اقمولا وبلىسى قورعالجىن اۋدانىندا قازاق حاندىعىنىڭ نەگىزىن قالاۋشىلاردىڭ ءبىرى جانىبەك حاننىڭ سۇيەگى دەپ توپشىلانعان ءمايىت قايتا جەرلەندى، دەپ حابارلايدى "ادىرنا" ۇلتتىق پورتالى Orda.kz-سىلتەپ.
تاريحي ماڭىزى زور راسىمگە عالىمدار، تاريحشىلار، ەتنولوگتار مەن ارحەولوگتار قاتىستى.
اكىمدىك مالىمەتىنشە، 10 قىركۇيەكتە سۇيەكتى قايتا جەرلەۋ جۇمىستارى قورعالجىن اۋدانى اكىمدىگى مەن ءماسليحاتى، وبلىستىق مادەنيەت باسقارماسىنىڭ قولداۋىمەن جۇزەگە اسقان. ءراسىم مۇسىلماندىق ءداستۇر بويىنشا ءوتىپ، قۇران باعىشتالىپ، قۇرباندىق شالىندى.
جانىبەك حان سۇيەگىنىڭ تابىلۋ تاريحى 2018 جىلدان باستاۋ الادى. ول كەزدە جانىبەك-شالقار كولى ماڭىنان حاندىق بەلگىلەرى بار كونە كىرپىشتەر تابىلعان. كەيىنگى ارحەولوگيالىق قازبالار كەزىندە بىرنەشە ادامنىڭ سۇيەكتەرى مەن التىن وردا داۋىرىنە تيەسىلى جادىگەرلەر شىققان. دنق ساراپتامالارىنىڭ ناتيجەسىندە ءبىر سۇيەك XV عاسىرداعى تورە اۋلەتىنە تيەسىلى ەكەنى 99,9% دالدىكپەن انىقتالدى. عالىمدار بۇل سۇيەك جانىبەك حانعا تيەسىلى بولۋى مۇمكىن دەپ وتىر.
سونىمەن قاتار، قورعالجىن اۋدانىنىڭ اكىمى الماس الين تاعى ءبىر ماڭىزدى دەرەكپەن ءبولىستى. ونىڭ ايتۋىنشا، XVI-XVII عاسىرداعى رەسەي كارتاسى نەگىزىندە قورعالجىن اۋماعىنان «م-كەرەي» دەگەن جازۋى بار جەر تابىلعان. زەرتتەۋلەر ناتيجەسىندە بۇل ورىن كەرەي حاننىڭ جەرلەنگەن جەرى بولۋى ىقتيمال. قازىر عالىمدار مەن جەرگىلىكتى بيلىك وكىلدەرى زەرتتەۋ جۇرگىزۋ ءۇشىن مينيسترلىككە رەسمي حات جولداۋعا دايىندالىپ جاتىر.
ماماندار بۇل وقيعانى رەسپۋبليكالىق دەڭگەيدەگى تاريحي جاڭالىق دەپ باعالاپ وتىر.
