رەسپۋبليكا كولەمىندە قيىن ومىرلىك جاعدايعا تۇسكەن وتباسىلاردى قولداۋ مەن تۇرمىستىق زورلىق-زومبىلىقتىڭ الدىن الۋ ماقساتىندا تىڭ باستاما قولعا الىنىپ، «جانۇيا» وتباسىن قولداۋ ورتالىقتارى تۇعىرىن تىكتەگەن بولاتىن. قازىرگى تاڭدا اتالعان مەكەمە وتباسىلارعا الەۋمەتتىك، قۇقىقتىق، پسيحولوگيالىق، قايىرىمدىلىق باعىتتارىندا ۇلكەن كومەكتەر كورسەتۋدە.
الاكول اۋداندىق «جانۇيا» وتباسىن قولداۋ جانە بەلسەندى ۇزاق ءومىر ءسۇرۋ ورتالىعىنىڭ اشىلعانىنا 1 جىلدىڭ ءجۇزى بولدى. جاڭا مەكەمە بولعانىمەن جۇمىس جۇيەسىنە تولىقتاي ەنىپ، ءبىرشاما ىستە باستاماشىل بولىپ كەلەدى.
2025 جىلدىڭ باسىنان بەرى ورتالىققا 18 وتباسى جۇگىنىپ، قاجەتتى قىزمەتتەردى الدى. سونىڭ ىشىندە ىشكىلىككە سالىنىپ، تار جول، تايعاق كەشۋلەردە تۋرا جولدان تايىپ كەتكەن تۇرعىندار دا بولدى. تالاي جىلدار بويى اشششى سۋدىڭ قۇربانى بولىپ، عۇمىرلارى قۇمىرا ىشىندەگى زالالمەن بايلانىسىپ كەتكەن ايەلدەردى وڭالتۋعا دا كوپ كۇش سالىندى.
ورتالىق تاراپىنان ەڭ الدىمەن كەلۋشىلەردى قوعامنىڭ تولىق مۇشەسى ەكەندىگىن سەزدىرىپ، مەملەكەت ءار ازاماتىنا كومەك قولىن سوزاتىندىعىن كورسەتۋدە. ماسەلەن، قازىرگى تاڭدا جۇمىسسىز بولعان 4 ايەل «بوس جۇمىس ورىندارى» جارمەڭكەسى جانە «مانساپ» ورتالىعىمەن جۇرگىزىلگەن جەمىستى جۇمىستاردىڭ ارقاسىندا قىزمەتكە ورنالاستى. ورتالىققا كەلگەندە ءومىردىڭ ءمانىن جوعالتقانداي كۇيدە بولعان بۇل ازاماتشالار قازىرگى تاڭدا بالا-شاعاسىنىڭ قامى ءۇشىن، وزدەرىنىڭ باياندى بولاشاعى ءۇشىن كۇرەسۋگە كۇش الدى. ال كۇشتى – ارينە «جانۇيا» وتباسىن قولداۋ ورتالىعى بەرگەندىگى ءمالىم.
بۇگىنگى تاڭدا كەلۋشىلەردىڭ ءبىرى ءۇشارال قالالىق اكىمدىگىنە، ەكىنشىسى الاكول اۋداندىق ورتالىق اۋرۋحاناسىنا تازالىقشى رەتىندە، ءۇشىنشىسى ۇلكەن كىسىگە جەكە كۇتۋشى، ءتورتىنشىسى بەسكول اۋىلدىق وكرۋگى اكىمدىگىنە قوعامدىق جۇمىسقا كىردى. دەمەك، قازىرگى تاڭدا مەكتەپ جاسىنداعى بالالارىن جەتكىزۋگە تۇراقتى تابىس كوزى بار، ىشكىلىكتەن باس تارتقان. ورتالىق قىزمەتكەرلەرى اپتا سايىن اتالعان وتباسىلاردى زەردەلەۋ ماقساتىندا ۇيلەرىنە بارىپ، سۇحباتتاسۋ جۇمىستارىن جۇرگىزۋدە. ياعني، باقىلاۋ مەن ءجون كورسەتۋ، جول سىلتەۋ جۇمىستارى جالعاسىن تابا بەرمەك.
بۇل جەردە ايتا كەتەتىنى ءتيىمدى مەموراندۋمدىق كەلىسىمشارتتار اسەر ەتۋدە. الاكول اۋداندىق «جانۇيا» وتباسىن قولداۋ جانە بەلسەندى ۇزاق ءومىر ءسۇرۋ ورتالىعى ءبىرىنشى كەزەكتە الاكول اۋداندىق پوليتسيا بولىمىمەن، اۋداندىق «الاكول» گازەتىمەن جانە «الاكولتۆ» اقپاراتتىق-تانىمدىق تەلەستۋدياسىمەن مەموراندۋم جاسادى. بۇل ءوز كەزەگىندە ورتالىق قىزمەتىن جۇيەلەندىرۋگە، ءموبيلدى توپتاردىڭ قىزمەتىن قارىمدى ەتۋگە، جۇمىس بارىسىن كەڭىنەن ناسيحاتتاۋعا جول اشتى. بۇگىنگە كەلۋشىلەردى جۇمىسپەن قامتۋ ماقساتىندا «مانساپ» ورتالىعىمەن، بالالاردىڭ وقۋى مەن وتباسىلاردىڭ دەنساۋلىعىنا دەن قويۋ ءۇشىن اۋداندىق ءبىلىم ءبولىمى مەن اۋداندىق ورتالىق اۋرۋحانامەن مەموراندۋم جاساۋ ءىسى قولعا الىنىپ وتىر.
وتباسى – ماحاببات پەن جاناشىرلىق مەكەنى. بۇل قاعيدات سوناۋ ادامزات تاريحى قالىپتاسقان مەزەتتەن بەرى كەلە جاتقان ۇعىم. ال قازىرگىدەي دامىعان زاماندا وتباسىلىق كيكىلجىڭدەر مەن ۇرىس-كەرىستەر، زورلىق-زومبىلىق كوبەيىپ جاتقاندىعى راس. ال «جانۇيا» ورتالىقتارى وسى باعىتتاعى ماسەلەلەردى رەتتەۋگە ۇلكەن سەپتىگىن تيگىزىپ وتىر.
المات ساديەۆ،
الاكول اۋداندىق «جانۇيا» وتباسىن قولداۋ جانە بەلسەندى ۇزاق ءومىر ءسۇرۋ ورتالىعىنىڭ ديرەكتورى
