الاكول كولىندە دەمالۋشىلاردىڭ قاۋىپسىزدىگىنە سوڭعى جىلداردا ەرەكشە نازار اۋدارىلۋدا. وسى ماقساتتا جاعالاۋ اۋماعىنداعى تاۋلىك بويى كەزەكشىلىككە 14 قۇتقارۋشى، 11 موتورلى قايىق تارتىلعان. قوعامدىق ءتارتىپتى ساقتاۋ ءۇشىن بيىلعى ماۋسىمدا 50 پوليتسيا قىزمەتكەرى جۇمىلدىرىلىپ، ولاردىڭ قىزمەتىنە 16 اۆتوكولىك پەن 5 درون پايدالانىلۋدا. بۇل تۋرالى وبلىس اكىمى بەيبىت يساباەۆتىڭ كول جاعالاۋىنىڭ شومىلۋ ماۋسىمىنا دايىندىعىن كورۋگە الاكول اۋدانىنا بارعان ساپارىندا ايتىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
سول سياقتى دەمالۋشىلاردىڭ قاۋىپسىزدىگىن قامتاماسىز ەتۋ ءۇشىن جاعالاۋ بويىندا 40 قۇتقارۋ مۇناراسى ورناتىلىپ، 13 شاقىرىم بۋيك جەلىسى تارتىلدى. سونىمەن قاتار 39 بەينەباقىلاۋ كامەراسى جۇمىس ىستەپ، 7 پيرس پايدالانۋعا بەرىلگەن.
الاكول اۋدانىنا بارعان ساپارىندا ءوڭىر باسشىسى اقشي اۋىلىنداعى جاعالاۋدا ورنالاسقان جەدەل قۇتقارۋ جاساعىنىڭ بولىمشەسىندە بولىپ، ونداعى جەدەل باسقارۋ ورتالىعى جۇيەسىنىڭ جۇمىسىمەن تانىستى. ارنايى ماماندار جاعالاۋداعى بەينەكامەرالار مەن ورتالىق جۇيەنىڭ ءوزارا بايلانىسى تۋرالى بايانداپ بەردى. وسى ورايدا بەيبىت يساباەۆ قوقىس شاشقان، رۇقسات ەتىلمەگەن ورىنعا كولىك قويعان، باسقا دا ءتارتىپ بۇزعان ازاماتتاردىڭ بەينەجازبالار ارقىلى انىقتالىپ، زاڭ اياسىندا جاۋاپقا تارتىلاتىنىن دەمالۋشىلار اراسىندا كەڭىنەن ءتۇسىندىرۋ كەرەكتىگىن تاپسىردى.
- قاۋىپسىزدىكتى قامتاماسىز ەتۋگە، ءتارتىپتىڭ ساقتالۋىنا ءتيىستى جاعدايلار جاسادىق، ەندى بۇل ءوزىنىڭ تيىمدىلىگىن ءىس جۇزىندە كورسەتۋى ءتيىس. باقىلاۋ جۇيەسىنىڭ قالاي جۇمىس ىستەيتىنىن، انىقتالعان زاڭ بۇزۋشىلىقتار بويىنشا قانداي شارالار قولدانىلاتىنىن حالىق اراسىندا تۇسىندىرىڭىزدەر. دەمالۋشىلار ءتارتىپ ساقتاۋدىڭ، سانيتارلىق تازالىقتىڭ، ءومىر قاۋىپسىزدىگىنىڭ اسا ماڭىزدى ەكەنىن ۇعىنۋى كەرەك، - دەدى ب. يساباەۆ.
ەسكە سالساق، وتكەن جىلى جەتىسۋ وبلىسىندا ورتاق سۋ پايدالانۋ جانە سۋ ايدىندارىنداعى قاۋىپسىزدىك ەرەجەلەرى بەكىتىلگەن بولاتىن.
اقشي اۋماعىندا بىرنەشە جىلدان بەرى قۇتقارۋ قىزمەتىندە جۇرگەن ەلامان احمەتقاليەۆ ءوز ويىن ءبىلدىردى.
- مەن اقشي اۋىلىنىڭ تۇرعىنىمىن. قۇتقارۋ قىزمەتىندە جۇرگەنىمە 6 جىل بولدى. جۇمىسىم وزىمە ۇنايدى، قۇتقارۋشى اسا ماڭىزدى ماماندىق دەپ ەسەپتەيمىن. ءبىز ەكى اۋىسىممەن كەزەكشىلىك ەتەمىز، وسىلايشا پاترۋلدەۋ جۇمىسى ۇزدىك جۇرگىزىلەدى، - دەدى ول.
اتاپ وتسەك، سونىمەن قاتار تۋريستەرگە ساپالى جانە جەدەل مەديتسينالىق كومەك كورسەتۋ ءۇشىن اقشي اۋىلىندا 4 دارىگەر، 2 ورتا بۋىن مەديتسينا قىزمەتكەرى قىزمەت اتقارادى. سونىمەن قاتار جەدەل جاردەم كولىگى مەن سانيتارلىق اۆتوكولىك تاۋلىك بويى كەزەكشىلىك ەتەدى. ال كوكتۇما اۋىلىندا 6 مەديتسينا قىزمەتكەرى جۇمىس ىستەيدى. دەمالۋشىلارعا قاجەتتى مەديتسينالىق كومەك كورسەتۋ ءۇشىن سانيتارلىق اۆتوكولىك قىزمەت كورسەتۋدە.
