باشقۇرتستانداعى بايماق قالاسىنىڭ ون مىڭنان اسا تۇرعىنى سوت عيماراتىنىڭ الدىنا ميتينگىگە شىعىپ جاتىر، دەپ حابارلايدى «ادىرنا» ۇلتتىق پورتالى.
حالىق «ۇلتارالىق ارازدىقتى قوزدىردى» (رف قىلمىستىق كودەكسىنىڭ 282-بابىنىڭ 1-بولىگى). دەگەن ايىپپەن ءتورت جىلعا سوتتالعان بەلسەندى فايل السىنوۆتى بوساتۋدى تالاپ ەتۋ ءۇشىن بايماق اۋداندىق سوتىنىڭ الدىنداعى الاڭعا جينالدى. تەرگەۋ كوميتەتى السىنوۆقا قارسى ءىستى باشقۇرتستان باسشىسى رادي حابيروۆتىڭ شاعىمى بويىنشا قوزعادى. نارازىلىق بىلدىرۋشىلەر السىنوۆتى «بەرمەيمىز» دەپ مالىمدەدى.
2023 جىلى السىنوۆ باشقۇرتستاندا التىن وندىرۋگە، سونداي-اق شاحتالارداعى ميگرانتتاردىڭ جۇمىسىنا قارسى نارازىلىقتارعا بەلسەندى قاتىسقان. تەرگەۋ قورىتىندىسى بويىنشا، 2023 جىلدىڭ ءساۋىر ايىندا يشمۋرزينو اۋىلىنىڭ تۇرعىندارىنىڭ جيىنىندا بەلسەندى «باشقۇرت تىلىندە، كاۆكاز، ورتا ازيا جانە ارمياندار حالىقتارىنا قاتىستى، بۇلار قارا حالىقتار» دەپ ءوز پىكىرىن بىلدىرگەن.
تۇركى حالىقتارىنىڭ تىلىندە «قاراپايىم حالىق» دەگەن ماعىنانى بىلدىرەتىن ءسوزى ءۇشىن سوت ونى جالپى رەجيمدەگى كولونياعا 4 جىلعا قاماۋ تۋرالى ۇكىم شىعاردى.
فايل السىنوۆ ءوز كىناسىن جوققا شىعارىپ، باشقۇرت تىلىندە سويلەگەنىن جانە ونىڭ ءسوزى دۇرىس تۇسىندىرىلمەگەنىن ايتىپ وتىر.
سوت وتىرىسىنا دەيىن
وتىرىس باستالار الدىندا قاۋىپسىزدىك قىزمەتكەرلەرى مەن ارنايى جاساق اۆتوبۋستارىنىڭ كومەگىمەن عيماراتقا جاقىنداۋدى توقتاتتى، دەپ حابارلايدى «ۆەرستكا». باسىلىمنىڭ حابارلاۋىنشا، سوت عيماراتىنان ءۇش شاقىرىم راديۋستا ينتەرنەت وشىرىلگەن. سونىمەن قاتار، رەسەيدىڭ بىرنەشە ايماقتارىندا WhatsApp جەلىسىنىڭ جۇمىسىندا اقاۋلار ورىن الدى، دەپ جازادى Baza تەلەگرام ارناسى. شاعىمداردىڭ كوپشىلىگى باشقۇرتستاننان بولعان.
«كۋشتاۋ بايرام» تەلەگرام ارناسىنىڭ مالىمەتىنشە، بۇل جەرگە بىرنەشە مىڭ نارازىلىق بىلدىرۋشىلەر جينالدى. «ۆەرستكا» ارناسىنىڭ ەسەپتەۋلەرىنە سايكەس، ءۇش مىڭداي ادام تۋرالى ايتىلسا، كەيىن ادامدار ميتينگ ورنىنا كەلۋدى جالعاستىرعان. كەيىنىرەك SOTAvision ارناسى نارازىلىق بىلدىرۋشىلەردىڭ سانىن 10 مىڭعا جەتكەنىن باعالادى.
حالىق «بوستاندىق»، «كۇش بىرلىكتە» دەپ ۇرانداعان.
پوليتسيامەن قاقتىعىس
ۇكىم شىعارىلعاننان كەيىن نارازىلىق بىلدىرۋشىلەردى قاماۋعا الۋ باستالدى. ارنايى جاساق ميتينگكە قاتىسۋشىلارعا قارسى كوزدەن جاس اعىزاتىن گاز قولداندى، دەپ حابارلايدى SOTAvision ءتىلشىسى.
ونىڭ ايتۋىنشا، قاۋىپسىزدىك قىزمەتكەرلەرى جينالعانداردى دۋبينكامەن ۇرىپ، سونىمەن قاتار كوپشىلىككە ءتۇتىن بومبالارىن لاقتىرعان. بۇعان جاۋاپ رەتىندە نارازىلىق بىلدىرۋشىلەر ارنايى جاساق پەن پوليتسياعا قاتىپ قالعان قار مەن مۇز بولىكتەرىن لاقتىرادى، دەيدى.
«ەر ادامداردى اياۋسىز ۇرىپ جاتتى. دۋبينكالارمەن باستارىنان ۇرىپ، بىرەۋدىڭ كوزىن اعىزىپ جىبەردى»، دەيدى.
قاقتىعىس بولىپ جاتقان جەردە «ودناجدى ۆ باشكيري» تەلەگرام ارناسى 300-گە جۋىق قۇقىق قورعاۋ ورگاندارىنىڭ قىزمەتكەرلەرى بار دەپ جازادى. بۇل رەتتە Baza ولاردىڭ سانى 600-دەن استام دەپ وتىر. «ودناجدى ۆ باشكيري» حابارلاعانداي، قاۋىپسىزدىك كۇشتەرى جارىق شۋ گراناتالارىن دا قولدانعان. وقيعا ورنىنىنداعى بەينەلەردە جارىلىستار ەستىلەدى.
زارداپ شەككەندەر مەن ۇستالعاندار تۋرالى حابار بولعانمەن، ولاردىڭ سانى بەلگىسىز. ءار ءتۇرلى باعامدار بويىنشا زارداپ شەككەندەر-بىرنەشە ادام، ۇستالعاندار سانى 5-تەن 20-عا دەيىن.
بۇعاتتاۋلار جانە كەلىسسوزدەر
باق-نىڭ حابارلاۋىنشا, «كۋشتاۋ بايرام» تەلەگرام ارناسى قولجەتىمسىز بولىپ تۇر. سوڭعى جازبا ماسكەۋ ۋاقىتىمەن 12:59-دا جاريالانعان. بۇل ەكىنشى رەت، ءبىر كۇن بۇرىن ارنا ءدال وسىلاي بۇعاتتالعان. سونداي-اق، جۋرناليستەر بايماقتاعى نارازىلىقتاردى بەلسەندى تۇردە جاريالاعان Rus News ارناسىنىڭ اشىلماي قالعانىن حابارلايدى.
نارازىلىق بىلدىرۋشىلەر مەن قاۋىپسىزدىك قىزمەتكەرلەرى اراسىندا كەلىسسوزدەر باستالدى، دەپ حابارلايدى «7ح7». باسىلىمنىڭ مالىمەتىنشە، فايل السىنوۆتىڭ اكەسى كەلىسسوز جۇرگىزۋشى بولىپ تابىلادى. ول قاۋىپسىزدىك قىزمەتكەرلەرىنە ۇستالعانداردى بوساتۋدى، ال نارازىلىق بىلدىرۋشىلەرگە سوت عيماراتىنىڭ الدىنداعى الاڭنان كەتۋدى ۇسىنعان.
SOTAvision مالىمەتتەرى بويىنشا، نارازىلىق بىلدىرۋشىلەر مەن قاۋىپسىزدىك قىزمەتكەرلەرى ۋاقىتشا بىتىمگە كەلىستى.
پوليتسيا بايماقتاعى نارازىلىق بىلدىرۋشىلەرگە قارسى جاپپاي تارتىپسىزدىكتەر تۋرالى قىلمىستىق ءىس قوزعادى، دەپ حابارلايدى «ريا نوۆوستي» اگەنتتىگى ىشكى ىستەر مينيسترلىگىنىڭ قوعامدىق كەڭەسىنىڭ باسشىسىنا سىلتەمە جاساپ.
بايماق قالاسى تۇرعىندارىنىڭ سانى 18 مىڭعا جۋىقتايدى.
اسحات احمەديار
