جۇما كۇنى بۇۇ باس اسسامبلەياسى پالەستينا ماسەلەسىن بەيبىت جولمەن شەشۋ جانە ەكى مەملەكەت — يزرايل مەن پالەستينا قۇرۋ تۋرالى شەشىمدى جۇزەگە اسىرۋدى قولدايتىن دەكلاراتسيانى باسىم داۋىسپەن ماقۇلدادى، دەپ حابارلايدى "ادىرنا" ۇلتتىق پورتالى.
داۋىس بەرۋ بارىسىندا 142 مەملەكەت «قولداپ» داۋىس بەردى. ولاردىڭ قاتارىندا قازاقستان دا بار. ال 10 مەملەكەت، سونىڭ ىشىندە يزرايل مەن اقش «قارسى» شىقتى. 12 مەملەكەت قالىس قالدى.
«نيۋ-يورك دەكلاراتسياسى» فرانتسيا مەن ساۋد ارابياسىنىڭ باستاماسىمەن جاز ايىندا بۇۇ شتاب-پاتەرىندە وتكەن حالىقارالىق كونفەرەنتسيانىڭ قورىتىندىسى بولدى. قۇجات گازاداعى قاقتىعىس پەن ەكى مەملەكەتتى شەشىمنىڭ السىرەۋىنە بايلانىستى قابىلدانعان.
دەكلاراتسيادا گازادا اتىستى دەرەۋ توقتاتۋ، كەپىلگە الىنعانداردى بوساتۋ، ەگەمەندى پالەستينا مەملەكەتىن قۇرۋ، حاماس-تى قارۋسىزداندىرۋ جانە گازانى باسقارۋدان شەتتەتۋ، يزرايلمەن قارىم-قاتىناستى قالىپقا كەلتىرۋ سياقتى بىرقاتار تالاپتار بار.
بۇۇ باس حاتشىسى انتونيۋ گۋتەرريش بۇل قۇجاتتىڭ باستى ءمانى ەكى تاۋەلسىز، ەگەمەن، دەموكراتيالىق مەملەكەتتىڭ بەيبىتشىلىك پەن قاۋىپسىزدىكتە قاتار ءومىر سۇرۋىندە ەكەنىن اتاپ ءوتتى.
الايدا ءيزرايلدىڭ بۇۇ-داعى ەلشىسى دەنني دانون دەكلاراتسيانى سىنعا الىپ، ونى «بىرجاقتى» جانە «اسسامبلەيا بەدەلىنە نۇقسان كەلتىرەتىن بوس قيمىل» دەپ باعالادى. ونىڭ ايتۋىنشا، مۇنداي شەشىمنەن حاماس كوبىرەك پايدا كورىپ وتىر.
