يراننىڭ يزرايلگە قارسى اسكەري ارەكەتتەرى جەرگىلىكتى ۋاقىت بويىنشا تاڭعى 4:00-دە اياقتالدى. بۇل تۋرالى يران يسلام رەسپۋبليكاسىنىڭ سىرتقى ىستەر ءمينيسترى ابباس اراگچيدىڭ 24 ماۋسىم كۇنى تەگەران ۋاقىتىمەن 4:03-تە X الەۋمەتتىك جەلىسىندە جاريالانعان مالىمدەمەسىنەن بەلگىلى بولدى، دەپ حابارلايدى “ادىرنا”.
«قۋاتتى قارۋلى كۇشتەرىمىزدىڭ ءيزرايلدىڭ اگرەسسياسى ءۇشىن جازا رەتىندە جاساعان اسكەري وپەراتسيالارى تاڭعى ساعات 4:00-گە دەيىن، سوڭعى مينۋتقا دەيىن جالعاستى»، – دەلىنگەن بۇل جازبادا.
سونىمەن قاتار، ديپلومات ءوز ەلىن «سوڭعى قانى تامعانشا قورعاۋعا دايىن» جانە «سوڭعى مينۋتقا دەيىن جاۋدىڭ كەز كەلگەن شابۋىلىنا جاۋاپ بەرەتىن» يراندىق اسكەريلەرگە العىس ايتتى.
كەيبىر باقىلاۋشىلار مەن بۇقارالىق اقپارات قۇرالدارى يران سىرتقى ىستەر ءمينيسترىنىڭ بۇل مالىمدەمەسىن يسلام رەسپۋبليكاسىنىڭ يزرايلمەن قاقتىعىستا اتىستى توقتاتۋعا دايىن ەكەنىنىڭ بەلگىسى رەتىندە قابىلدادى. بۇعان دەيىن، 23 ماۋسىم كەشكە، اقش پرەزيدەنتى دونالد ترامپ Truth Social جەلىسىندە يران مەن ءيزرايلدىڭ الداعى بىرنەشە ساعاتتا اتىستى توقتاتۋعا دايىن ەكەنىن حابارلاعان بولاتىن.
الايدا، تەگەران ۋاقىتىمەن 3:46-دا ابباس اراگچي X جەلىسىندە يران مەن يزرايل اراسىندا اتىستى توقتاتۋ تۋرالى كەلىسىم جوق ەكەنىن، بىراق ەگەر يزرايل تەگەران ۋاقىتىمەن تاڭعى 4:00-گە دەيىن ارەكەتىن توقتاتسا، يران دا "جاۋاپ بەرۋ ارەكەتتەرىن" دوعارۋعا دايىن ەكەنىن جازدى.
«قازىرگى ۋاقىتتا اتىستى توقتاتۋ نەمەسە اسكەري وپەراتسيالاردى توقتاتۋ تۋرالى ەشقانداي "كەلىسىم" جوق. الايدا، ەگەر يزرايل رەجيمى يران حالقىنا قارسى زاڭسىز اگرەسسياسىن تەگەران ۋاقىتىمەن تاڭعى ساعات 4:00-گە دەيىن توقتاتسا، ءبىز دە بۇل ۋاقىتتان كەيىن جاۋاپ ارەكەتتەرىمىزدى جالعاستىرۋدى كوزدەمەيمىز. ءبىزدىڭ اسكەري وپەراتسيالاردى تولىق توقتاتۋ تۋرالى سوڭعى شەشىم كەيىنىرەك قابىلدانادى»، دەپ جازدى اراگچي.
