2026 جىلعى فۋتبولدان الەم چەمپيوناتىنىڭ G توبىنداعى ەكىنشى تۋر ماتچىندا بەلگيا مەن يران قۇرامالارى 0:0 ەسەبىمەن تەڭ ءتۇستى، دەپ حابارلايدى «ادىرنا» ءتىلشىسى.
كەزدەسۋ 21 ماۋسىمنان 22 ماۋسىمعا قاراعان ءتۇنى اقش-تىڭ لوس-اندجەلەس قالاسىندا ءوتتى. ءبىرىنشى تۋردا بەلگيالىقتار مىسىردى جەڭە الماعان بولسا، يران قۇراماسى جاڭا زەلانديامەن ناتيجەلى ويىن وتكىزىپ، كوپ گول سوعىلعان ماتچتىڭ قاتىسۋشىسى اتانعان ەدى.
ماتچتىڭ 25-مينۋتىندا يراندىقتار ايىپ سوققىسىن شەبەر ورىنداپ، ەسەپ اشۋعا جاقىن بولدى. الايدا شابۋىلشى مەحدي تارەميدىڭ گولىن بەينەقايتالاۋ جۇيەسى (VAR) وفسايدقا بايلانىستى ەسەپكە المادى.
ماتچتىڭ 66-مينۋتىندا بەلگيالىق قورعاۋشى ناتان نگوي قاقپاشىمەن جەكە-دارا شىعۋعا ۇمتىلعان يراندىق شابۋىلشى مەحدي تارەميدى ەرەجە بۇزىپ توقتاتىپ، قىزىل قاعاز الدى. وسىلايشا بەلگيا كەزدەسۋدىڭ قالعان بولىگىن 10 ويىنشىمەن وتكىزدى.
ماتچ ستاتيستيكاسى بويىنشا بەلگيا قۇراماسى دوپقا يەلىك ەتۋدە ايقىن باسىمدىق تانىتىپ، ۋاقىتتىڭ 70 پايىزىندا دوپتى باقىلاۋىندا ۇستادى. يراننىڭ كورسەتكىشى — 30 پايىز. سونداي-اق بەلگيالىقتار قارسىلاس قاقپاسىنا 23 رەت سوققى جاساعانىمەن، ونىڭ تەك جەتەۋى عانا قاقپا دالدىگىنە باعىتتالدى. ال يراندىقتار 7 سوققى جاساپ، سونىڭ ۇشەۋى قاقپاعا ءدال ءتيدى.
قازىر بەلگيا مەن يراندا 2 ۇپايدان بار. توپتاعى جولدامالاردىڭ تاعدىرى سوڭعى تۋردا شەشىلەدى. كەلەسى ماتچتا بەلگيا قۇراماسى 27 ماۋسىمدا جاڭا زەلانديا كومانداسىمەن وينايدى، ال يران سول كۇنى مىسىر قۇراماسىنا قارسى كەزدەسەدى.
