استانادا اشارشىلىق قۇرباندارىنا ارنالعان ەسكەرتكىش تاقتاداعى «گولودومور» ءسوزى «گولود» دەپ تۇزەتىلدى، دەپ حابارلايدى "ادىرنا" ۇلتتىق پورتالى Orda.kz-كە سىلتەپ.
بۇل وزگەرىس بەلسەندى ءالىمجان ءىزباساروۆتىڭ جەكە شاعىمى نەگىزىندە جاسالعانىن Threads-تەگى «قىزىل وتاۋ» پاراقشاسىندا حابارلانعان.
بۇعان دەيىن تاقتايشاداعى «گولودومور» تەرمينى قولدان جاسالعان اشارشىلىقتى بىلدىرەتىنى ايتىلعان.
جازباعا سايكەس، «گولود» ءسوزى اشتىقتى جالپى قۇبىلىس رەتىندە سيپاتتاپ، ونىڭ ادەيى ۇيىمداستىرىلعانىن جوققا شىعارادى.
«گولودومور – كەڭەس ۇكىمەتىنىڭ قاساقانا حالىقتى اشارشىلىق ارقىلى قىرىپ تاستاۋىن بىلدىرەتىن، شىندىققا ەش قاتىسى جوق ۇگىت-ناسيحات... ءبىز اشارشىلىقتى جانە ونىڭ قۇرباندارىن جوققا شىعارمايمىز. بىراق مۇنىڭ ادەيى جاسالعانىن نەمەسە تولىعىمەن كەڭەس ۇكىمەتىنىڭ كىناسى ەكەنىن مويىنداي المايمىز»، – دەلىنگەن جازبادا.
