استانادا ەكى ەر ادام قوعامدىق ءتارتىپتى بۇزعانى ءۇشىن اكىمشىلىك قاماۋعا الىندى، دەپ حابارلايدى "ادىرنا" ۇلتتىق پورتالى.
ولار جاڭبىردان كەيىن پايدا بولعان شالشىقتا شومىلىپ، ماڭايداعى بالالارعا سۋ شاشقان. وقيعا الەۋمەتتىك جەلىلەردە تاراعان بەينەجازبا ارقىلى بەلگىلى بولدى.
استانا قالاسى پوليتسيا دەپارتامەنتىنىڭ مالىمەتىنشە، قۇقىقبۇزۋشىلىق فاكتىسىن پوليتسەيلەر الەۋمەتتىك جەلىلەردى باقىلاۋ بارىسىندا انىقتاعان. بەينەجازبادا ەر ادامداردىڭ الكوگولدىك ىشىمدىك ءىشىپ، شالشىققا ءتۇسىپ شومىلعانى جانە سۋدى اينالاسىندا تۇرعان بالالارعا قاراي شاشقانى كورىنەدى.
پوليتسيا قىزمەتكەرلەرى تەكسەرۋ جۇرگىزىپ، وقيعاعا قاتىسقان ازاماتتاردىڭ جەكە باسىن انىقتادى. ەكەۋى دە ۇساق بۇزاقىلىق جاساعانى ءۇشىن اكىمشىلىك جاۋاپكەرشىلىككە تارتىلدى.
سوت شەشىمىمەن ەر ادامداردىڭ بىرىنە 25 تاۋلىك، ەكىنشىسىنە 7 تاۋلىك اكىمشىلىك قاماۋ جازاسى تاعايىندالدى.
