Aqorda prezident Qasym-Jomart Toqaevtyŋ Joldauda aitqan «tärtıp būzatyn äielderge» qatysty sözıne tüsınıkteme berdı, dep habarlaidy «Adyrna» tılşısı.
Habarlamada keibır jandardyŋ memleket basşysynyŋ sözın eskertu retınde qabyldaǧany aitylǧan.
«Prezidenttıŋ Qazaqstan halqyna joldauy tūrǧyn üi-kommunaldyq şaruaşylyqtan bastap, auyl şaruaşylyǧy, sifrlandyru, su salasy, bılım, sport jäne basqa da köptegen mäselelerdı qamtydy. Erekşe nazar «Zaŋ jäne Tärtıp» qaǧidatyn saqtau – memlekettıŋ ırgetasy retınde qarastyruǧa audaryldy. Joldauda prezident azamattardy kez kelgen qūqyqbūzuşylyqqa «nöldık tözımdılık» tanytuǧa şaqyrdy. Osy oraida memleket basşysy: «Ökınışke qarai, qoǧamdyq tärtıptı būzuşylardyŋ arasynda äielder de bar», - dep atap öttı. Keibıreuler mūny eskertu retınde qabyldady, bıraq mänı mülde basqa. Eger ejelden sūlulyqtyŋ, näzıktıktıŋ, üilesımnıŋ simvoly bolǧan äielder janjaldarǧa aralasa bastasa, demek, mınez-qūlyq mädenietınıŋ daǧdarysy şynymen de kürdelı sipatqa ie boldy degen söz», - delıngen habarlamada.
Aqorda būl mälımdemenı jalpy qoǧamǧa aitylǧan ündeu retınde qabyldau kerektıgın jetkızdı.
«Būl sögıs emes, jynysyna, jasyna nemese şyqqan tegıne qaramastan, barşamyzǧa baǧyttalǧan qūrmettı qarym-qatynas mädenietın qaita oraltuǧa şaqyru. Joldarda, kezekterde, vokzaldarda, ūşaqtarda jäne basqa jerlerde jiılep ketken özara qūrmetsızdık jaǧdailary bızdıŋ mentalitetımızdıŋ bır bölıgıne ainalmauy tiıs Sondyqtan aitylǧan sözderdıŋ mänı – etika men qarym-qatynas mädenietın qalyptastyruda, ädeptılık pen özara qūrmettı arttyruda jatyr. Būl mındet eşqaşan tek äielderdıŋ moinyna jüktelmeidı. Būl – bükıl qoǧamnyŋ mındetı»,– delıngen habarlamada.
Eske salaiyq, būǧan deiın prezident öz Joldauynda qoǧamdyq tärtıptı būzatyn äielder de bar ekenın atap ötken edı.
«Aşyǧyn aituymyz kerek, qazır adamdarda dörekı söilep, bır-bırıne eregısıp, jaǧa jyrtysatyn ädet bar. Osyndai keleŋsız oqiǧalardy, äsırese, qoǧamdyq oryndarda, jol boiynda jiı köruge bolady. Ökınışke qarai, solardyŋ ışınde aiqai-şu şyǧaratyn, balaǧat sözder aityp, qoǧamdyq tärtıptı būzatyn äielder de bar. Būl – mädeniettı, örkeniettı qoǧamǧa jaraspaityn qylyq, elımızdıŋ halyqaralyq qoǧamdastyqtaǧy bedelıne ziian keltıretın qūbylys», degen edı Toqaev.
