قازاقستاننىڭ ەفيوپياداعى ەلشىسى، افريكا وداعى جانىنداعى تۇراقتى وكىلى بارلىباي سادىقوۆ ەفيوپيالىق باسىلىمداردىڭ جۋرناليستەرى ءۇشىن بريفينگ وتكىزدى. بۇل تۋرالى قازاقستان رەسپۋبليكاسىنىڭ ەفيوپياداعى ەلشىلىگى جاريالادى، دەپ حابارلايدى “ادىرنا” ۇلتتىق پورتالى.
ءىس-شاراعا ەفيوپيالىق تەلەراديوكورپوراتسياسىنىڭ، وروميالىق تەلەراديوكورپوراتسياسىنىڭ وكىلدەرى، جانە ەفيوپيانىڭ «Capital» گازەتىنىڭ باس رەداكتورى قاتىستى.
ەلشى ەفيوپيا قوعامىن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ 2021 جىلعى 1 قىركۇيەكتەگى قازاقستان حالقىنا جولداۋىنىڭ نەگىزگى ەرەجەلەرى تۋرالى حاباردار ەتتى. جولداۋدا پرەزيدەنت ءاربىر قازاقستان ازاماتىنىڭ ءال-اۋقاتىن جاقسارتۋ، قۇقىقتارى مەن بوستاندىقتارىن نىعايتۋ ماقساتىندا ەلدەگى ەكونوميكالىق، ساياسي جانە الەۋمەتتىك رەفورمالاردى ودان ءارى جالعاستىرۋ قاجەتتىلىگىنە باسا نازار اۋدارعانىن اتاپ ءوتىلدى.
“بريفينگ بارىسىندا قازاقستاننىڭ قاۋىپسىزدىك پەن بەيبىتشىلىكتى نىعايتۋ، يادرولىق قارۋسىزدانۋ مەن تاراتپاۋ، تەرروريزممەن كۇرەسۋ، بىتىمگەرشىلىك، دىنارالىق كەلىسىم سالاسىنداعى حالىقارالىق باستامالارى ەگجەي-تەگجەيلى تالقىلاندى. قازاقستان ەلشىسى ءۇ.ج. 6 قازاندا نۇر-سۇلتان قالاسىندا وتكەن الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ وتىرىسى جانە 2022 جىلى VII سەزىنىڭ وتكىزىلۋى جوسپارلانعانى تۋرالى ايتىپ بەردى. اعىمداعى جىلدىڭ 12 قازانىندا نۇر-سۇلتاندا وتكەن اوسشك مينيسترلەر كەزدەسۋىندە ايتىلعان قازاقستاننىڭ اوسشك-گە توراعالىعىنىڭ باسىمدىقتارى جۋرناليستەرگە ءتۇسىندىرىلدى”، - دەلىنگەن حابارلامادا.
سونداي-اق، ەفيوپيالىق جۋرناليستەر داعدارىستاردى ەڭسەرۋدەگى، سىرتقى سەرىكتەستەرمەن دوستىق قارىم-قاتىناستى دامىتۋداعى قازاقستاندىق تاجىريبەگە، قازاقستان مەن ەفيوپيا اراسىنداعى ەكىجاقتى ىنتىماقتاستىقتى دامىتۋدىڭ پەرسپەكتيۆالارىنا جوعارى باعا بەردى.
“ادىرنا” ۇلتتىق پورتالى
