وزبەكستان پرەزيدەنتى شاۆكات ميرزيوەۆ جوعارى ءبىلىم، عىلىم جانە يننوۆاتسيالار ءمينيسترىنىڭ ءۇش ورىنباسارىن قىزمەتىنەن بوساتتى. بۇل تۋرالى مەملەكەت باسشىسىنىڭ ءباسپاسوز حاتشىسى شەرزود اسادوۆ ايتتى، دەپ حابارلايدى «ادىرنا» ءتىلشىسى.
مەملەكەت باسشىسى شوحرۋح ديليەۆ، وتابەك ماحكاموۆ پەن سارۆارحون بۋزرۋكحونوۆتىڭ سالا رەفورمالارىنىڭ ءمانىن تولىق تۇسىنبەگەنىن مالىمدەدى.
«مەكتەپكە دەيىنگى جانە مەكتەپتەگى ءبىلىم بەرۋ جۇيەسىندە وزگەرىستەر بولىپ جاتىر، باعدارلامالار جۇمىس ىستەپ تۇر، ناتيجەلەر بار. ال كاسىبي جانە جوعارى ءبىلىم ءۇشىن جاۋاپتى شەنەۋنىكتەر ازىرگە رەفورمالاردىڭ ءمانىن تولىق تۇسىنگەن جوق»، – دەپ اتاپ ءوتتى پرەزيدەنت.
ال جوعارى ءبىلىم، عىلىم جانە يننوۆاتسيالار ءمينيسترى كونگراتباي شاريپوۆ قىزمەتىندە قالدى.
مينيسترلىككە قاراستى يننوۆاتسيالىق دامۋ اگەنتتىگىنىڭ ديرەكتورى شاروف رادجابباەۆ تا ورنىنان بوساتىلدى. بۇدان بولەك، پرەزيدەنت اكىمشىلىگى جانىنداعى ءبىلىم ساپاسىن قامتاماسىز ەتۋ جونىندەگى ۇلتتىق اگەنتتىكتىڭ باسشىسى ادحام حۋدايقۇلوۆ باسقا جۇمىسقا اۋىسۋىنا بايلانىستى قىزمەتىنەن بوساتىلعانى جاريالاندى.
ميرزيوەۆتىڭ ايتۋىنشا، مەكتەپكە دەيىنگى جانە مەكتەپتەگى ءبىلىم بەرۋ، سونداي-اق جوعارى ءبىلىم، عىلىم جانە يننوۆاتسيالار مينيسترلەرى، ولاردىڭ ورىنباسارلارى مەن ءوڭىر اكىمدەرى پروفيلاكتيكالىق جانە پرواكتيۆتى جۇمىس تاسىلدەرىنە كوشىپ، ءبىلىم بەرۋ جۇيەسىنىڭ بارلىق بۋىندارىندا تۇبەگەيلى وزگەرىستەردى جۇزەگە اسىرۋى ءتيىس.
