مەملەكەت باسشىسى قاسىم-جومارت توقاەۆ حالىققا ارناعان جولداۋىندا ەكىنشى جانە ءۇشىنشى اتوم ەلەكير ستانتسياسىن سالۋدى جوسپارلاۋ قاجەت ەكەنىن ايتتى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەمە جاساپ.
پرەزيدەنتتىڭ ايتۋىنشا، الداعى بەس جىلدا قۋاتى 6,3 گيگاۆاتت بولاتىن جاڭا «جاسىل» ەنەرگيا نىساندارىن ىسكە قوسۋ جوسپارلانىپ وتىر. بۇل قازاقستانداعى جاڭارتىلاتىن ەنەرگيا كوزدەرىنىڭ ۇلەسىن ايتارلىقتاي ارتتىرماق.
پرەزيدەنت ءبىر اي بۇرىن الماتى وبلىسىندا العاشقى اتوم ەلەكتر ستانتسياسىن سالۋ جوباسى «روساتوممەن» بىرلەسە باستالعانىمەن، بۇل ەكونوميكانىڭ تۇراقتى دامۋى ءۇشىن جەتكىلىكسىز ەكەنىن ايتتى.
«ەكىنشى، ءتىپتى ءۇشىنشى اتوم ەلەكتر ستانتسياسىنىڭ قۇرىلىسىن قازىردەن باستاپ جوسپارلاي بەرۋىمىز كەرەك»، – دەدى توقاەۆ.
سونىمەن قاتار مەملەكەت باسشىسى جۋىردا قىتاي حالىق رەسپۋبليكاسىنىڭ توراعاسى سي تسزينپينمەن كەزدەسۋدە اتوم سالاسىنداعى ستراتەگيالىق سەرىكتەستىككە قول جەتكىزىلگەنىن اتاپ ءوتتى.
قازاقستان الەمدىك ءىرى كومپانيالاردىڭ بارلىعىمەن ءوزارا ءتيىمدى بايلانىس ورناتۋعا دايىن ەكەنىن جەتكىزگەن پرەزيدەنت بۇل ۇستانىم ەلدىڭ ەنەرگەتيكالىق دەربەستىگىن قامتاماسىز ەتۋگە باعىتتالعانىن ايتتى.
