استانادا «اۋىل» پارتياسىنىڭ توراعاسى سەرىك ەگىزباەۆتىڭ جەتەكشىلىگىمەن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قازاقستان حالقىنا جولداۋىن تالقىلاۋعا ارنالعان رەسپۋبليكالىق پارتيالىق اكتيۆتىڭ وتىرىسى ءوتتى.
جيىنعا ءماجىلىس دەپۋتاتتارى، بارلىق وڭىرلىك فيليالداردىڭ باسشىلارى مەن وكىلدەرى، پارتيا بەلسەندىلەرى، سونداي-اق ورتالىق اپپاراتتىڭ جاۋاپتى قىزمەتكەرلەرى قاتىستى. سونىمەن قاتار بەينەكونفەرەنتسيا ارقىلى وبلىستىق جانە اۋداندىق دەڭگەيدەگى پارتيا قۇرىلىمدارىنىڭ توراعالارى دا قوسىلىپ، تالقىلاۋعا كەڭ كولەمدە قاتىسۋعا مۇمكىندىك جاسالدى.
وتىرىستى اشا وتىرىپ، سەرىك ەگىزباەۆ پرەزيدەنتتىڭ جولداۋى — مەملەكەتتىڭ الداعى جىلدارداعى دامۋ باعىتىن ايقىندايتىن ستراتەگيالىق قۇجات ەكەنىن اتاپ ءوتتى. ونىڭ ايتۋىنشا، بۇل قۇجات ەلدىڭ ساياسي جۇيەسى مەن قوعام ءومىرىنىڭ بارلىق سالالارى ءۇشىن نەگىزگى باعىت-باعداردى بەلگىلەيدى.
«اۋىل» پارتياسىنىڭ باستى مىندەتى – جولداۋدىڭ مازمۇنىن ءاربىر ازاماتقا، اسىرەسە اۋىل تۇرعىندارىنا جەتكىزۋ عانا ەمەس، ونى جۇزەگە اسىرۋعا بەلسەندى اتسالىسۋ. بۇل بىزدەن ناقتى قادامداردى تالاپ ەتەتىن ءىس-قيمىل جوسپارى. ءبىز اۋىل شارۋاشىلىعى سالاسىن، ينفراقۇرىلىمدى دامىتۋدى جانە اۋىلداعى حالىقتىڭ ءومىر ساپاسىن ارتتىرۋدى باستى باسىمدىقتار رەتىندە قاراستىرامىز»، – دەدى پارتيا توراعاسى.
تالقىلاۋ بارىسىندا قاتىسۋشىلار جولداۋدا ايتىلعان نەگىزگى باستامالارعا توقتالدى. نەگىزگى نازار ەلىمىزدە ءبىر پالاتالى پارلامەنت قۇرۋ تۋرالى ۇسىنىس پەن ونىڭ ساياسي جۇيەگە اسەرىنە، اۋىل شارۋاشىلىعىن زاماناۋي تەحنولوگيالاردى ەنگىزۋ ارقىلى جاڭعىرتۋعا جانە ونىڭ تيىمدىلىگىن ارتتىرۋعا، اۋىلدىق وڭىرلەردىڭ ينفراقۇرىلىمىن دامىتۋعا – جولدار، اۋىز سۋ، ينتەرنەت جانە الەۋمەتتىك نىساندارعا، سونداي-اق شالعاي اۋىلدار مەن شاعىن ەلدى مەكەندەر تۇرعىندارىنا الەۋمەتتىك قولداۋدى كۇشەيتۋ شارالارىنا اۋدارىلدى.
جيىن بارىسىندا ءماجىلىس دەپۋتاتتارى دا ءوز پىكىرلەرىن ورتاعا سالدى. ولار پرەزيدەنت ۇسىنعان رەفورمالاردىڭ اۋىلداعى الەۋمەتتىك جانە ەكونوميكالىق جاعدايدى تۇبەگەيلى جاقسارتۋعا باعىتتالعانىن اتاپ ءوتتى. دەپۋتاتتار ەلىمىزدىڭ اگرارلىق سەكتورىن قولداۋ، اۋىل كاسىپكەرلەرىن نەسيەلەۋ، جاستاردى اۋىلدا قالدىرۋعا ارنالعان ىنتالاندىرۋ شارالارى، ءبىلىم مەن مەديتسينالىق قىزمەتتىڭ قولجەتىمدىلىگىن ارتتىرۋ، سونداي-اق زاڭنامالىق دەڭگەيدە قاجەت باستامالاردى ازىرلەۋ بويىنشا ناقتى ۇسىنىستارىن ايتتى.
سەرىك ەگىزباەۆ اۋىلدى دامىتۋ مەملەكەتتىك ساياساتتىڭ نەگىزگى باسىمدىقتارىنىڭ ءبىرى بولۋى ءتيىس ەكەنىن ەرەكشە اتاپ ءوتتى. ول تەك اۋىلدىق اۋماقتاردىڭ ماسەلەلەرىن كەشەندى شەشۋ ارقىلى ازاماتتاردىڭ ءال-اۋقاتىن ارتتىرۋعا جانە ەلدىڭ ازىق-تۇلىك قاۋىپسىزدىگىن قامتاماسىز ەتۋگە بولاتىنىن جەتكىزدى.
وتىرىستا ءسوز العان وڭىرلىك فيليالداردىڭ وكىلدەرى ءوز ايماقتارىنداعى جاعداي تۋرالى اقپارات بەرىپ، شەشۋدى قاجەت ەتەتىن باستى ماسەلەلەردى اتاپ ءوتتى. ولار اۋىلدىق جەرلەردە جۇمىس ورىندارىنىڭ جەتىسپەۋشىلىگى، توزىعى جەتكەن ينفراقۇرىلىم مەن ساپالى الەۋمەتتىك قىزمەتتەردىڭ تاپشىلىعى وزەكتى كۇيىندە قالىپ وتىرعانىن ايتتى. اسىرەسە مەديتسينالىق قىزمەت ساپاسىن جاقسارتۋ، بىلىمگە قولجەتىمدىلىكتى ارتتىرۋ جانە شارۋا قوجالىقتارى مەن شاعىن اۋىل شارۋاشىلىعى كاسىپورىندارىن قولداۋ اسا ماڭىزدى ەكەنى اتاپ ءوتىلدى.
وڭىرلەردىڭ وكىلدەرى جولداۋدا كوتەرىلگەن پرەزيدەنت باستامالارى اۋىل تۇرعىندارىنىڭ ءۇمىت-تىلەكتەرىنە ساي كەلەتىنىن جانە اۋىلداعى جاعدايدى وڭ باعىتتا وزگەرتۋگە مۇمكىندىك بەرەتىنىن ەرەكشە ايتتى.
سونداي-اق جولداۋدى حالىق اراسىندا كەڭىنەن ناسيحاتتاۋ ءۇشىن ارنايى ءىس-شارالار جوسپارىن ازىرلەۋ تۋرالى شەشىم قابىلداندى. بۇل جوسپارعا وڭىرلەردە ءتۇسىندىرۋ جۇمىستارىن جۇرگىزۋ، تۇرعىندارمەن كەزدەسۋلەر، فورۋمدار، سەمينارلار جانە دوڭگەلەك ۇستەلدەر وتكىزۋ كىرەدى.
جيىندى قورىتىندىلاي كەلە، سەرىك ەگىزباەۆ «اۋىل» پارتياسىنىڭ مەملەكەت باسشىسى ۇسىنعان رەفورمالار مەن باستامالاردى جۇزەگە اسىرۋداعى باستى كۇشتەردىڭ ءبىرى بولۋعا دايىن ەكەنىن اتاپ ءوتتى.
" ءبىزدىڭ مىندەتىمىز – قوعامنىڭ كۇش-جىگەرىن بىرىكتىرىپ، بارلىق رەسۋرستاردى جۇمىلدىرۋ ارقىلى جولداۋداعى ءاربىر تاپسىرمانىڭ ناقتى ورىندالۋىن قامتاماسىز ەتۋ. ءبىز پرەزيدەنت باستامالارىن قولداپ قانا قويماي، ءوزىمىزدىڭ دە جوبالارىمىز بەن ۇسىنىستارىمىزدى ەنگىزىپ، ازاماتتارىمىزدىڭ ءومىرىن جاقسارتۋعا ۇلەس قوسامىز", – دەدى پارتيا توراعاسى.
ول سونداي-اق جۇمىستىڭ بارلىق باعىتتاردا – پارلامەنتتەگى زاڭنامالىق باستامالاردان باستاپ وڭىرلەردەگى ناقتى جوبالارعا دەيىن بەلسەندى تۇردە جۇرگىزىلەتىنىن ايتتى.
