استانادا Hyundai اۆتوكولىگىنىڭ جۇرگىزۋشىسى جاياۋ جۇرگىنشىلەر كوپىرىنە كىرىپ كەتكەنى ءۇشىن 10 تاۋلىككە اكىمشىلىك قاماۋعا الىندى. بۇل تۋرالى قالا اكىمدىگى مالىمدەدى، دەپ حابارلايدى “ادىرنا”.
وقيعا 1 قىركۇيەك كۇنى بولعان. Hyundai Accent كولىگىن تىزگىندەگەن جۇرگىزۋشى اتىراۋ كوپىرىنە كىرىپ، جول ءجۇرۋ ەرەجەلەرىن بۇزىپ، اينالاسىنداعىلارعا قۇرمەتسىزدىك تانىتقان.
“پوليتسيا قر اكىمشىلىك قۇقىقبۇزۋشىلىقتار تۋرالى كودەكستىڭ 434 جانە 437-باپتارى بويىنشا ءىس ماتەريالدارىن جيناعان. ارنايى مامانداندىرىلعان اۋدانارالىق اكىمشىلىك سوت بۇل جاس جىگىتكە 10 تاۋلىك اكىمشىلىك قاماۋ جازاسىن تاعايىندادى”، دەلىنگەن حابارلامادا.
پوليتسيا دەپارتامەنتى مۇنداي ارەكەتتەردىڭ قاۋىپسىزدىككە قاتەر ءتوندىرىپ، قوعامدىق ءتارتىپتى بۇزاتىنىن اتاپ ءوتتى. جىل باسىنان بەرى ەلوردادا ۇساق بۇزاقىلىق پەن ۆانداليزم ءۇشىن جۇزدەن استام ادام جاۋاپقا تارتىلعان.
