استانا قالاسىندا 2024 جىلدىڭ 8-14 قىركۇيەگى ارالىعىندا 5-ءشى دۇنيەجۇزىلىك كوشپەندىلەر ويىندارى وتەدى. وعان دايىندىق قالاي ءجۇرىپ جاتقانىن مءاجىلىستىڭ الەۋمەتتىك-مادەني دامۋ كوميتەتىنىڭ وتىرىسىندا تۋريزم جانە سپورت ءمينيسترى ەرمەك مارجىقپاەۆ باياندادى، دەپ حابارلايدى “ادىرنا” ۇلتتىق پورتالى.
«ەلوردادا وتەتىن دۇنيەجۇزىلىك كوشپەندىلەر ويىنىنا 100-دەن استام ەلدەن جالپى سانى 3000-عا جۋىق ادامنان تۇراتىن دەلەگاتسيالار قاتىسادى دەپ كۇتىلىپ وتىر. بۇگىنگى تاڭدا 75 ەل قاتىساتىنىن رەسمي راستادى»، - دەدى ول.
ءمينيستردىڭ ايتۋىنا قاراعاندا، ويىندا باعدارلاماسىنا 20 جارىستىق جانە 10 كورنەكى سپورت ءتۇرى كىرگەن، 110 مەدال جيىنتىعى ساراپقا سالىنادى.
«جارىس ات سپورتى، ۇلتتىق كۇرەس، ساداق اتۋ، قۇسبەگىلىك، ءداستۇرلى زياتكەرلىك ويىندار بويىنشا وتەدى»، - دەدى ەرمەك مارجىقپاەۆ.
ايتا كەتەيىك، بۇعان دەيىن قازاقستان پرەزيدەنتى قاسىم-جومارت توقاەۆ سۋ تاسقىنىنا بايلانىستى قارجىنى ۇنەمدەۋ ماقساتىندا استانا حالىقارالىق فورۋمىن توقتاتقان ەدى.
“مەملەكەت باسشىسى قاسىم-جومارت توقاەۆ ەلىمىزدەگى جويقىن سۋ تاسقىنىنىڭ سالدارىن جويۋ جانە زارداپ شەككەن ازاماتتارعا كومەكتەسۋ ءۇشىن باسقا شارالارعا جۇمسالاتىن قارجىنى بارىنشا ۇنەمدەۋ قاجەت ەكەنىن ەسكەرە وتىرىپ، بيىلعى 13-14 ماۋسىمعا جوسپارلانعان استانا حالىقارالىق فورۋمىن وتكىزبەۋ تۋرالى شەشىم قابىلدادى” دەلىنگەن اقوردا حابارلاماسىندا.
