اقش مەملەكەتتىك حاتشىسى ءوز پاراقشاسىندا اقش-تىڭ حالىقارالىق دامۋ اگەنتتىگىنىڭ (USAID) جابىلعانىن جازدى، دەپ حابارلايدى "ادىرنا" ۇلتتىق پورتالى كۋرسيۆكە سىلتەپ.
بۇل شەشىم پرەزيدەنت دونالد ترامپتىڭ باستاماسىمەن قولعا الىنعان اۋقىمدى رەفورما اياسىندا قابىلداندى.
رۋبيونىڭ ايتۋىنشا، 2025 جىلدىڭ قاڭتارىندا شەتەلدىك كومەك باعدارلامالارى 90 كۇنگە توقتاتىلىپ، قايتا قارالدى.
«قاڭتاردان بەرى ءبىز سالىق تولەۋشىلەرگە ونداعان ميلليارد دوللار ۇنەمدەدىك. USAID رەسمي تۇردە جابىلادى، نەگىزگى باعدارلامالار مەملەكەتتىك دەپارتامەنتكە بەرىلەدى»، – دەدى مەملەكەتتىك حاتشى.
The Guardian دەرەگىنشە، 2025 جىلدىڭ 30 قىركۇيەگىنە دەيىن USAID-ءتىڭ بارلىق شەتەلدىك وكىلدىكتەرى جابىلىپ، اگەنتتىك باعدارلامالارىنىڭ 83%-ى قىسقارعان.
دونالد ترامپ كونگرەسكە جاساعان ۇندەۋىندە USAID شىعىندارىن «داۋلى» جانە ء«مانسىز» دەپ اتاپ، شەتەلدەگى لگبت قۇقىقتارىن قورعاۋعا بولىنگەن 40 ملن دوللاردى، سونىڭ ىشىندە قازاقستانداعى لگبت قاۋىمداستىعىنا قولداۋ كورسەتۋگە بولىنگەن 10 ملن دوللاردى سىنعا الدى.
The New York Post مالىمەتىنشە، ترامپ اكىمشىلىگى شەتەلدىك كومەكتى 5 ملرد دوللارعا قىسقارتۋدى جوسپارلاپ وتىر. ونىڭ 3,2 ملرد دوللارى USAID ۇلەسىنە تيەسىلى بولعان.
الايدا Lancet جۋرنالى USAID باعدارلامالارىنىڭ توقتاۋى گۋمانيتارلىق كومەكتىڭ قىسقارۋىنا اكەلىپ، الداعى جىلدارى 14 ملن-نان استام ادامنىڭ ومىرىنە قاۋىپ ءتوندىرۋى مۇمكىن ەكەنىن ەسكەرتتى.
