2025 جىلدىڭ قاڭتار-ماۋسىم ايلارىندا قازاقستاندا جارتى ميلليوننان استام ادام جۇمىسسىز قالدى، دەپ حابارلايدى "ادىرنا" ۇلتتىق پورتالى LS-كە سىلتەمە جاساپ.
ۇلتتىق ستاتيستيكا بيۋروسىنىڭ دەرەكتەرىنە سۇيەنسەك، وسى كەزەڭدە 506 مىڭنان استام قازاقستاندىق جۇمىس ورنىنان كەتكەن. ونىڭ ىشىندە 91,8 مىڭ ادام ءتۇرلى سەبەپتەرمەن جۇمىستان شىعارىلسا، 414,5 مىڭ ادام ءوز ەركىمەن قىزمەتىنەن كەتكەن.
قىزمەتكەرلەردى قىسقارتۋ سالدارىنان 7,7 مىڭ ادام جۇمىسسىز قالعان. ەڭبەك ءتارتىبىن بۇزعانى ءۇشىن 3 مىڭنان استام قازاقستاندىق جۇمىستان شىعارىلعان. ال 2,8 مىڭ ادام ەكى تاراپقا دا تاۋەلسىز سەبەپتەرگە بايلانىستى جۇمىستان ايىرىلدى. كاسىپورىنداردىڭ جابىلۋى 758 ادامنىڭ جۇمىسسىز قالۋىنا اكەلسە، لاۋازىمعا ساي كەلمەۋ نەمەسە بىلىكتىلىكتىڭ جەتكىلىكسىزدىگى سەبەبىنەن 265 ادام جۇمىستان بوساتىلعان. «باسقا سەبەپتەر» ساناتىنا 77,2 مىڭ ادام كىرگەن.
جۇمىسسىز قالعانداردىڭ كوبى ونەركاسىپ سالاسىندا (88,7 مىڭ), ساۋدا جانە اۆتوكولىك پەن موتوتسيكل جوندەۋ (75,5 مىڭ), ءبىلىم بەرۋ (60,7 مىڭ), مەملەكەتتىك باسقارۋ جانە قورعانىس (49,4 مىڭ), دەنساۋلىق ساقتاۋ جانە الەۋمەتتىك قىزمەت كورسەتۋ (47,5 مىڭ) سالالارىندا بولعان.
كادرلار تۇراقسىزدىعى ەڭ جوعارى سالالار رەتىندە جىلجىمايتىن مۇلىكپەن وپەراتسيالار (41,4%), جارناما جانە نارىقتى زەرتتەۋ (40,6%), بولشەك ساۋدا (34,8%), كينو، تەلەباعدارلاما جانە مۋزىكا ءوندىرىسى (28,3%), جۇمىسپەن قامتۋ قىزمەتى (28,3%), تۋريستىك اگەنتتىكتەر (24,3%) كورسەتىلگەن.
وڭىرلەر بويىنشا الماتىدا 101,5 مىڭ ادام جۇمىستان كەتكەن. ال استانادا 59,6 مىڭ، قاراعاندى وبلىسىندا 37,9 مىڭ، اتىراۋ وبلىسىندا 36 مىڭ ادام جۇمىسسىز قالعان.
