الماتى وبلىسىنىڭ تۇرعىنىنىڭ ايتۋىنشا، بالاسى سەمىزدىك اۋرۋىنا شالدىققان. نەبارى ءۇش جاستاعى بالانىڭ سالماعى 52 كگ. بۇل تۋرالى استارلى اقيقات باعدارلاماسىندا ءسوز بولدى، دەپ حابارلايدى "ادىرنا" ۇلتتىق پورتالى Stan.kz سايتىنا سىلتەمە جاساپ.
دارىگەرلەر كىشكەنتاي ءنۇراليدىڭ جۇرەگىن ماي باسىپ جاتىر دەيدى. وكپەسىندە دەمىكپە بار دەپ دابىل قاعۋدا. بالامنىڭ تابانىنا كىرگەن تىكەن ماڭدايىما نەگە كىرمەدى دەپ كۇندىز ءتۇنى پەرزەنتىنىڭ اماندىعىن تىلەپ وتىرعان اتا انانىڭ ەندىگى ءۇمىتى ءسىز بەن بىزدە.
ەرلى-زايىپتى 3 جاستاعى ۇلدارى ءنۇراليدىڭ دەنساۋلىعى ءۇشىن كومەك سۇرايدى. ءنۇرالي ءوز جاسىنا ساي ەمەس ارتىق سالماق جيناعان. اسقا تابەتى دە ەرەكشە. ال دارىگەرلەر بالاعا ناقتى دياگنوز قويا الماپتى.
ءنۇرالي 3 جاستا. سالماعى 52 كەلى. بويى 100 سم. بويى ءوز جاسىنا ساي كەلگەنىمەن، سالماعى ارتىق. ادەتتە مۇنداي جاستا بالانىڭ سالماعى 13-17 كەلى بولۋ كەرەك. اتا-اناسىنىڭ ايتۋىنشا، اسقا تابەتى زور. ەگەر تاماقتى از بەرسە، كوگەرىپ جىلاپ، تىنىس الا الماي قالادى.
"ۇلكەن كولەمدەگى كيىمدەردى ساتىپ اكەلەمىن. ماعان شاق كيىمدەردى كيەدى. ۇلكەن جورگەكقاپتاردى كيەدى. ديەتا ساقتاپ كوردىك. وعان شىدامايدى. سۇراعان نارسەسىن بەرسەمەم، جىلايدى. كوگەرىپ جىلاعاندا تالىپ قالا ما دەپ قورقامىز. تويعانىن بىلمەيدى. 5 مينۋت سايىن قارنى اشىپ تۇرادى. ديەتالىق تاعامداردى جەمەيمىن دەپ جىلايدى. ءتاتتىنى كوپ جەيدى", - دەدى اناسى ناعيما.
بالاسى اناسىنا باعىنبايدى، اكەسىنە اداپ كوندىگەدى ەكەن. الايدا ءبىر جەردەن ءبىر جەرگە الانى اپارۋدىڭ ءوزى مۇڭ.
"مەنىڭ ءوزىمنىڭ سالماعىم 58 كەلى. بالامدىكى 52 كەلى. كوتەرىپ جۇرگەن قيىن. بىراق امال جوق، بالام بولعان سوڭ كونەمىن. ءوزى كوپ جۇرمەيدى. شارشاپ قالادى. دەم جەتىسپەي قالادى. جۇرەگىن ماي باسا باستاعان. باسقا بالالارعا ىلەسە المايدى. تەز شارشايدى. بالامنىڭ دەنساۋلىعىنا ۋايىمدايمىن. ەمدەلىپ كەتسە ەكەن دەيمىن", - دەپ دىلادى اكەسى.
بۇل رەتتە ساراپشى ماماندار اتا-انانىڭ بالانىڭ ايتقانىن ىستەپ ۇيرەنگەنىن ايتادى. بۇل بالانىڭ ەركە بولۋىنا، سەمىزدىككە شالدىعۋىنا اكەپ سوعادى دەپ ەسكەرتتى.
"شەكتەن تىس ەركەلىك بالاعا كەرى اسەر ەتۋى مۇمكىن. بالانىڭ ايتقانىن ىستەي بەرۋگە دە بولمايدى. بالانىڭ سۇراعاننىن بەرە بەرۋ دە ول ءۇشىن زياندى. سۇراعان سايىن تاماق بەرە بەرسە، ءوزىن قيمىلداتپاي كوتەرىپ جۇرسە، ول بالاننىڭ سەمىزدىككە شالدىعۋىنىڭ بىردەن ءبىر سالدارى", - دەدى ولار.
ال ەندوكرينولوگ مامان ءنۇراليدىڭ سەمىزدىكتىڭ ءۇشىنشى، سوڭعى دارەجەسىندە ەكەنىن ايتتى.
"مەن ءنۇراليدىڭ باقىلاپ وتىرىپ ونىڭ بويىنان ەشقانداي اۋىتقۋشىلىق كورىپ وتىرعان جوقپىن. بالا ءوز جاسىنا ساي پسيحولوگياسى دامىعان. تەك سالماعى كوپ", - دەدى پسيحولوگ.
الماتى تەمىرجول اۋرۋحاناسى نۇراليدەن ءتيىستى اناليزدەر الىپ، بارلىق دارىگەردىڭ قابىلداۋىنا تەگىن قابىلداۋعا دايار ەكەنىن ايتتى. الداعى ۋاقىتتا ءنۇرالي وسى مامانداردىڭ باقىلاۋىندا بولادى.
