بوكستان پەكين وليمپياداسىنىڭ قولا ، الەمنىڭ كۇمىس جانە قولا جۇلدەگەرى ەركەبۇلان شىناليەۆ وزىنە قاستاندىق جاسالعانىن ايتىپ، پوليتسيا مەن پروكۋراتۋرادان كومەك سۇرادى. بۇل تۋرالى ول الەۋمەتتىك جەلىگە ۆيدەو جاريالادى، دەپ حابارلايدى "ادىرنا".
ونىڭ ايتۋىنشا، 2025 جىلدىڭ مامىر ايىندا قازاقستاندىق ەكى ازامات ونى ستامبۇلعا (تۇركيا) باپكەر بولۋعا شاقىرادى.
«ستامبۇلعا بارعاندا سول ازاماتتاردىڭ ۇيىندە ون كۇندەي تۇردىم، ەكەۋىنە باپكەر بولىپ، جاتتىعۋلار جاسادىق. ەلگە ورالعاننان كەيىن شىڭعىس مۇقاشەۆ قايتا حابارلاسىپ، ءبىر-ەكى ازاماتتىڭ اياق-قولىن سىندىرۋ كەرەگىن ايتتى. مەن ءۇزىلدى-كەسىلدى باس تارتتىم»، - دەيدى وليمپيادا جۇلدەگەرى.
ارادا ءبىراز ۋاقىت وتكەننەن كەيىن ەركەبۇلانعا تۇركيادان تاعى دا قوڭىراۋ تۇسكەن.
«بيىل قاڭتار ايىندا ولار تاعى حابارلاسىپ، تۇركياعا تاعى شاقىردى. ءارى باپكەر بولاسىڭ، ءارى جاڭا جوسپارلار بار دەدى. مەن بارعان سوڭ اۋەجايدان كۇتىپ الىپ، ستامبۇلدان 150-200 شاقىرىم الىستاعى نۋ ورمانعا الىپ باردى دا، تاستاندى عيماراتقا كىرگىزدى. باسىما وقتالعان پيستولەت تاقاپ، ءبىر قاعازداردى كورسەتتى، «ۇقك-نىڭ وكىلىمىن دەپ ايتاسىڭ» دەپ ماجبۇرلەدى. مەن قورىققانىمنان تالاپ ەتكەننىڭ ءبارىن ايتىپ بەردىم»، - دەيدى ە.شىناليەۆ.
ونىڭ سوزىنشە، ورماندا تاعى بىرنەشە ادام بولعان. ءبارى دە ورتا ازيادان تۇركياعا قاشىپ بارعان ساقالدى جىگىتتەر كورىنەدى.
«مەنىڭ ويىمشا، ولار تۇركيا بيلىگىنەن ساياسي باسپانا سۇراپ الۋ ءۇشىن وسىنداي ارەكەتكە باردى»، - دەپ بولجامىن ايتتى سپورتشى.
ۆيدەوۇندەۋ سوڭىندا وليمپيادا جۇلدەگەرى قر ىشكى ىستەر مينيسترلىگىنەن جانە باس پروكۋراتۋرادان كومەك سۇراعان.
