اۋعانستاننىڭ گەرات پروۆينتسياسىندا ءىرى جول اپاتى بولىپ، 79 ادام قازا تاپتى، دەپ حابارلايدى "ادىرنا" ۇلتتىق پورتالى.
قۇربانداردىڭ ىشىندە 19 بالا بار ەكەنى انىقتالدى.
وقيعا يسلام-كالا شەكارا بەكەتىنەن شىققان جولاۋشىلار اۆتوبۋسى كابۋلعا قاراي بەت العان كەزدە بولعان. سوڭعى ايلاردا ءدال وسى بەكەتتەن يراننان دەپورتاتسيالانعان اۋعان ازاماتتارى تاسىمالدانىپ كەلگەن.
اينالما جولدا اۆتوبۋس جۇرگىزۋشىسى رولگە يە بولا الماي، موتوتسيكل جانە جانارماي تاسىعان جۇك كولىگىمەن سوقتىعىسقان.
سوققىدان كەيىن كولىك ورتەنىپ، اۆتوبۋستىڭ ءىشى تۇگەلدەي وتقا وراندى. كوپتەگەن جولاۋشى سىرتقا شىعىپ ۇلگەرمەي، ىشتە قالىپ قويعان. ءۇش جۇرگىزۋشىنىڭ بارلىعى دا وقيعا ورنىندا كوز جۇمدى.
جەرگىلىكتى بيلىك وكىلدەرىنىڭ ايتۋىنشا، اپاتقا اۆتوبۋستىڭ جىلدامدىقتى اسىرعانى مەن جۇرگىزۋشىنىڭ سالعىرتتىعى سەبەپ بولعان. بۇعان قوسا، جولداردىڭ ناشارلىعى دا جاعدايدى ۋشىقتىرعان.
