قازاقستاننىڭ اۋعانستانداعى ەلشىسى ءالىمحان ەسەنگەلديەۆ جەكسەنبى كۇنى كابۋلدا اۋعانستاننىڭ سىرتقى ىستەر ءمينيسترىنىڭ مىندەتىن اتقارۋشى ءامىر حان موتتاكيمەن كەزدەستى، ونى تامىز ايىندا ەلدى باسىپ العان "تاليبان" قوزعالىسى تاعايىندادى، دەپ حابارلايدى "ادىرنا" ۇلتتىق پورتالى.
بۇل قازاقستاندىق وكىلدىڭ قازاقستاندا تەرروريستىك دەپ تانىلعان قوزعالىس جەتەكشىلەرىنىڭ بىرىمەن جوعارى دەڭگەيدەگى العاشقى بايلانىسى.
- كەزدەسۋ بارىسىندا تاراپتار ەكى ەل اراسىنداعى ساۋدانى دامىتۋدىڭ ماڭىزدىلىعىن اتاپ ءوتىپ، ساۋدا سالاسىنداعى ەكىجاقتى ىنتىماقتاستىقتى كەڭەيتۋگە ۋادە بەردى، - دەپ مالىمدەدى تاليبان وكىلى Twitter -دە.
- ەلشى كابۋلداعى قاۋىپسىزدىك جاعدايىنا قاناعاتتانۋشىلىق ءبىلدىرىپ، اۋعانستانعا گۋمانيتارلىق كومەك جەتكىزۋگە شاقىردى، - دەلىنگەن سودىرلاردىڭ تاعى ءبىر حابارلاماسىندا.
قر سىرتقى ىستەر مينيسترلىگى وسى ۋاقىتقا دەيىن بۇل كەزدەسۋ تۋرالى ەشتەڭە حابارلاعان جوق. بۇعان دەيىن ەل بيلىگى اۋعانستاننىڭ جاڭا باسشىلىعىمەن بايلانىس ورناتۋ قاجەتتىلىگى تۋرالى مالىمدەگەن بولاتىن. قازاقستان سوڭعى جىلدارى ەلىمىزگە استىق، ۇن جانە وتىن ساتا وتىرىپ، اۋعان بيلىگىمەن تۇراقتى ساۋدا بايلانىستارىنا يە بولدى.
ايتاي كەتەيىك، بۇعان دەيىن "تاليبانمەن" وزبەكستان مەن قىرعىزستان بايلانىس ورناتا باستاعان بولاتىن. تاجىكستان "تاليبانمەن" بايلانىس مۇمكىندىگىن ءۇزىلدى-كەسىلدى جوققا شىعاردى جانە اۋعانستان ىشىندە وعان قارسىلىقتى اشىق قولداپ وتىر. تاليبان سودىرلارى كابۋلدى باسىپ العاننان كەيىن قازاقستان ءوز ەلشىلىگىن تولىعىمەن ەۆاكۋاتسيالاي المادى، تەك ديپلوماتتار مەن ولاردىڭ وتباسىلارىنىڭ ءبىر بولىگىن عانا الىپ كەتتى. تامىز ايىندا تاليبان كابۋلداعى قازاقستان ەلشىلىگىن كۇزەتەتىنى حابارلاندى.
"ادىرنا" ۇلتتىق پورتالى
