نۇرجان نۇرجىگىتوۆ – جاڭا ۇكىمەتكە ەسكى ۇكىمەت قۇرامىنان جەتكەن اكىم. ونىڭ جامبىل وبلىسىنىڭ باسشىسى بولىپ تاعايىندالعانىنا ءبىر جىلدان اسىپ بارادى. ۇكىمەت ءۇيى دالىزىندە اdyrna.kz ءتىلشىسى ايماقتا قالىپتاسقان جاعداي جانە اكىمنىڭ سىنعا ۇشىراعان ارەكەتتەرى تۋرالى شاعىن سۇحبات الۋعا تىرىستى.
ايماقتاعى ەڭبەك داۋى تۋرالى
– ءسىز جامبىلعا اكىم بولىپ كەلگەلى اۋليەتادا بىرنەشە ەڭبەك داۋى بولدى. مۇنى ءسىز نەمەن بايلانىستىراسىز؟ جالپى ەرەۋىلشىلەردىڭ الدىنا ءوزىڭىز نەگە شىقپادىڭىز؟
– بىزدە كوبىنەسە ەڭبەك داۋى «قازفوسفات» مەكەمەسىندە بولىپ جاتىر. ال ەندى ول كاسىپورىنداعى جۇمىستارعا بايلانىستى. سوندىقتان كاسىپورىندار ول ماسەلەنى وزدەرى شەشىپ جاتىر.
– سوڭعى جاڭاتاستا بولعان نارازىلىق قالاي شەشىلدى؟
– الداعى 10 كۇن ىشىندە «قازفوسفات» جشس باسشىلارى تاراپىنان بۇل ماسەلەگە بايلانىستى شەشىم ايتىلادى. قازىرگى كەزدە كوميسسيا قۇرىلىپ، جۇمىسشىلار تاراپىنان 10 ادام جۇمىس ىستەپ جاتىر. الداعى ۋاقىتتا شەشىم شىعارىلاتىن بولادى.
پرەمەرمەن بولە ەمەس...
– الەۋمەتتىك جەلىدە «نۇرجىگىتوۆ جۋالىدان شىققان ءوز جەرلەستەرىن باسشىلىق قىزمەتكە تاعايىنداپ جاتىر» دەگەن سىن ءجيى ايتىلادى. جەرلەستەرىڭىزدى باسشىلىققا تاعايىنداۋ ارقىلى جۇمىستا ولقىلىق كەتىپ جاتقان جوق پا؟
– جۋالى اۋدانىنان كوپ ادام تاعايىندالىپ جاتقان جوق.
– مىسالى وبلىس اكىمىنىڭ اپپارات باسشىسى ماتەن ءمادي جۋالى اۋدانىنان ەكەن..
– سول ءبىر-اق ادام شىعار اپپارات باسشىسى بولعان. بۇگىنگى كۇنى بۇكىل اۋدانداردىڭ ازاماتتارى مەملەكەتتىك قىزمەتكە تاعايىندالىپ جاتىر.
– الەۋمەتتىك جەلىدە ءسىزدىڭ كۇيەۋ بالاڭىز دەلىنگەن سۇلتان مارات قورداي اۋدانى سپورت بولىمىنە باسشى بولدى دەگەن اقپارات شىقتى. كۇيەۋ بالاڭىز ەكەنى راس پا؟
– ءيا، كۇيەۋ بالام. مەن وبلىس اكىمى بولعانعا دەيىن-اق ول مەنىڭ كۇيەۋ بالام بولىپ ۇلگەرگەن. ول ازامات قورداي اۋدانىندا ماعان دەيىن دە جۇمىس ىستەپ جۇرگەن بولاتىن.
– كۇيەۋ بالاڭىزدىڭ اۋداندا ءبولىم باسشىسى بولۋى قايشىلىق تۋدىرماي ما؟
– مەملەكەتتىك قىزمەت تۋرالى زاڭدا ەشقانداي قايشىلىق جوق.
– اۋدان اكىمى ءبولىم باسشىسى كەمشىلىك جىبەرسە سوگىس بەرە الا ما؟
– مۇنىڭ ءبارى مەملەكەتتىك قىزمەت تۋرالى زاڭدا كورسەتىلگەن.
– وسىدان كەيىن كۇيەۋ بالاڭىزدى قىزمەتتەن الىپ تاستايسىز با؟ (سۇراقتى ەستي سالا اكىم سىتىلىپ كەتۋگە تىرىستى) نۇرجىگىتوۆ مىرزا، نەگە سۇراققا توقتاپ جاۋاپ بەرمەيسىز؟
– مەن ايتىپ وتىرمىن عوي، مەملەكەتتىك قىزمەت تۋرالى زاڭدا ءبارى كورسەتىلگەن. ءوزىنىڭ كاسىبي قىزمەتى مەن تاجىريبەسىنە بايلانىستى كىم قانداي قىزمەتكە تاعايىندالاتىنى جازىلعان.
– ءسىزدى ۇكىمەت باسشىسى ءاليحان سمايىلوۆتىڭ بولەسى دەسەدى. بۇل اقپارات راس پا؟
– ءبىز بولە ەمەسپىز...
اكىم جۇمىسىن ۇكىمەت باعالايدى دەيدى. حالىق شە؟..
– ال جەرلەستەرىڭىز «نۇرجىگىتوۆ وبلىستى دۇرىس باسقارا الماي جاتىر» دەپ سىنايدى...
– وعان ەندى مەملەكەت باسشىسى مەن ۇكىمەت باعا بەرەدى.
– ءوز جۇمىسىڭىزعا كوڭىلىڭىز تولا ما؟
– مەملەكەت باسشىسى مەن ۇكىمەت تاراپىنان كىم قالاي جۇمىس ىستەپ جاتقانىنا بايلانىستى باعا بەرىلەدى. مەملەكەت باسشىسى ءار ازامات ءوزىنىڭ جاۋاپكەرشىلىگىن سەزىنۋ كەرەك دەپ ايتتى عوي.
– پرەزيدەنت اكىمدەردىڭ كوشەگە شىعىپ، ەل ءىشىن جاياۋ ارالاۋ كەرەگىن ايتتى. ءسىزدى كوشەدەن كورمەك تۇگىلى كابينەتىڭىزدەن ىزدەپ تاپپاي كەتكەن كەزدەر بولدى...
– مەن بىلتىر 35 اۋىلدىق وكرۋگقا باردىم. بۇگىنگى كۇنى 20-دان استام اۋىلدىق وكرۋگقا بارىپ، اۋىل تۇرعىندارىمەن كەزدەستىم. وسى جىلدىڭ اياعىنا دەيىن 60 جۋىق اۋىلدىق وكرۋگكە بارىپ، تۇرعىندارمەن كەزدەسەمىز. بۇل تۋرالى مەملەكەت باسشىسى تاپسىرما بەرگەن. مىندەتتى تۇردە تۇرعىندارمەن كەزدەسىپ ءجۇرمىز. كوپتەگەن ماسەلە باقىلاۋعا الىنىپ، سول جەردە شەشىلىپ جاتىر.
– ءسىزدىڭ استاناعا ءسوزىڭىز وتە مە؟ -
– ونى جۇمىس كورسەتەدى... (سۇراقتى ەستىگەن اكىم سول جەردەن تاعى دا سىتىلىپ شىعۋعا تىرىستى)
سەرىك جولداسباي
"ادىرنا" ۇلتتىق پورتالى
