ۇلىتاۋ وبلىسىنىڭ اكىمى داستان رىسپەكوۆتىڭ توراعالىعىمەن قر پرەزيدەنتى ق.ك. توقاەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا ارناعان جولداۋىن تالقىلاۋ بويىنشا جيىن ءوتتى.
ءىس-شاراعا مەملەكەتتىك ورگانداردىڭ باسشىلارى، دەپۋتاتتار، ساراپشىلار قاۋىمداستىعى، ازاماتتىق قوعام وكىلدەرى، كاسىپكەرلەر جانە جاستار قاتىستى.
وبلىستىق ءماسليحاتتىڭ دەپۋتاتى سۆەتلانا جۋمكينا مەملەكەت باسشىسىنىڭ جولداۋىن ەل دامۋىنىڭ جاڭا كەزەڭىنە جول اشاتىن ستراتەگيالىق قۇجات ەكەنىن اتاپ ءوتتى. ول جولداۋدا كوتەرىلگەن جەتى باسىم باعىتتىڭ ارقايسىسى – ۋاقىت تالابى مەن ەل بولاشاعى ءۇشىن ماڭىزدى شەشىمدەر ەكەنىنە نازار اۋداردى. اسىرەسە، جاساندى ينتەللەكت، تسيفرلاندىرۋ، ءبىلىم بەرۋ جانە جۇمىسشى ماماندىقتارىنىڭ بەدەلىن ارتتىرۋ باعىتىنداعى باستامالار - كەلەشەك ۇرپاقتىڭ دامۋىنا نەگىز بولاتىنىن اتاپ ءوتتى.
ۇلىتاۋ وبلىسىنىڭ كاسىپكەرلىك جانە ونەركاسىپ باسقارماسىنىڭ باسشىسى دانيار ارىنعازين 2025 جىلدىڭ 7 ايىنداعى ينۆەستيتسيالىق احۋال مەن تۋريزم سالاسىنىڭ دامۋ كورسەتكىشتەرىمەن ءبولىستى. بيىلعى جىلى ءوڭىر ەكونوميكاسىنا تارتىلعان ينۆەستيتسيا كولەمى 103,4 ملرد تەڭگەگە جەتىپ، وتكەن جىلدىڭ سايكەس كەزەڭىمەن سالىستىرعاندا 9%-عا وسكەن. قازىرگى ۋاقىتتا جالپى قۇنى 937 ملرد تەڭگەنى قۇرايتىن 22 ءىرى جوبا جۇزەگە اسىرىلۋدا، ولار 2 مىڭنان استام جاڭا جۇمىس ورنىن اشۋعا مۇمكىندىك بەرەدى.
جيىن بارىسىندا وبلىستىق تسيفرلىق تەحنولوگيالار باسقارماسى وڭىردە جۇزەگە اسىرىلىپ جاتقان بىرنەشە يننوۆاتسيالىق جاساندى ينتەللەكت (جي) جوبالارى تۋرالى مالىمەت بەردى. ماسەلەن، جەزقازعان قالاسىنىڭ جولدارىن تسيفرلاندىرۋ جوباسى شۇڭقىرلاردى انىقتاپ، جول بەلگىلەرىن ورناتۋ بويىنشا ۇسىنىستار ەنگىزەدى.
VisionGuardAI بەينەمونيتورينگ جۇيەسى 11 الەۋمەتتىك نىساندا ورناتىلىپ، قاۋىپسىزدىكتى قامتاماسىز ەتەدى. «109 بىرىڭعاي بايلانىس ورتالىعى» Mindia مەتا-پلاتفورماسىنىڭ كومەگىمەن تاپسىرمالار اۆتوماتتاندىرىلىپ، وتىنىشتەر جىلدام وڭدەلۋدە. سونىمەن قاتار، «پروتوكول» جۇيەسى كەڭەس وتىرىستارىنىڭ اۋديوجازبالارىن ماتىنگە اينالدىرادى، ال جي-اۋدارماشى مەملەكەتتىك قۇجاتتاردى قازاق جانە ورىس تىلدەرىنە ساپالى اۋدارادى.
ۇلىتاۋ حابتا Scout AI, DocGuard AI, Talapker AI جانە WorkClock سياقتى يننوۆاتسيالىق جوبالار ازىرلەنىپ، قۇجات اينالىمى، ءبىلىم جانە ەڭبەك ونىمدىلىگىن ارتتىرۋ باعىتىندا ىسكە اسىرىلۋدا. وبلىستىق تسيفرلىق تەحنولوگيالار باسقارماسىنىڭ باسشىسى ەرمەك جازىلحانۇلى جاساندى ينتەللەكت پەن تسيفرلاندىرۋدىڭ ءوڭىردىڭ دامۋىنا جاڭا سەرپىن بەرىپ، مەملەكەتتىك قىزمەتتەردىڭ ساپاسىن ارتتىراتىنىن اتاپ ءوتتى.
وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى المات ساۋحيموۆ جولداۋدا بەلگىلەنگەن اۋىل شارۋاشىلىعىن جاڭا دەڭگەيگە كوتەرۋ جانە جەردى ءتيىمدى پايدالانۋ باعىتىنداعى تاپسىرمالارعا توقتالدى. تسيفرلاندىرۋ اياسىندا جەردى بەرۋ تاسىلدەرى ەلەكتروندى فورماتقا كوشىرىلىپ، كوسمومونيتورينگ جۇيەسى ارقىلى پايدالانىلماي جاتقان جەرلەر انىقتالىپ، مەملەكەت مەنشىگىنە قايتارىلۋدا.
2023-2025 جىلدارى پايدالانىلماي جاتقان جەرلەردىڭ كولەمى جوسپاردان اسىپ ورىندالىپ، ولار قايتا اينالىمعا ەنگىزىلۋدە. اۋىل شارۋاشىلىعى جەرلەرىن ءتيىمدى پايدالانۋ جانە زاڭ بۇزۋشىلىقتاردى جويۋ ماقساتىندا ارنايى كوميسسيا قۇرىلىپ، ناقتى ۇسىنىستار ازىرلەنۋدە.
وبلىستىق تۋريستىك گيد ساعدات مۇحامبەتوۆ ءوڭىردىڭ تاريحي جانە تابيعي الەۋەتىن اتاپ، ونىڭ ىشىندە جوشى حان مەن الاشا حاننىڭ مازارلارى، اقجار بورلى شاتقالى، بۇلانتى شايقاسىنىڭ تاريحي ورنى سياقتى كيەلى جەرلەردىڭ تۋريستىك كارتانىڭ ماڭىزدى نىساندارىنا اينالاتىنىن جەتكىزدى.
كەزدەسۋ قورىتىندىسى بويىنشا ءوڭىر باسشىسى داستان رىسپەكوۆ پرەزيدەنت جولداۋىندا ايقىندالعان باسىم باعىتتاردى جۇزەگە اسىرۋ ماقساتىندا وبلىس اكىمىنىڭ ورىنباسارلارى مەن ءتيىستى باسقارما باسشىلارىنا ناقتى تاپسىرمالار جۇكتەپ، ولاردى ساپالى جانە جۇيەلى تۇردە جۇزەگە اسىرۋ بويىنشا وڭىرلىك ءىس-شارالار جوسپارىن بەكىتۋدى مىندەتتەدى.
