الماتىدا ەكولوگتار كۇنى مەن دۇنيەجۇزىلىك قورشاعان ورتانى قورعاۋ كۇنىنە وراي ۇيىمداستىرىلعان ءىس-شارالار اياسىندا جالپىقالالىق ەكولوگيالىق سەنبىلىك ءوتتى. بۇل تۋرالى قالالىق ەكولوگيا جانە قورشاعان ورتا باسقارماسىنىڭ وكىلدەرى ايتتى.
ەكولوگيالىق اكتسيا قالانىڭ سانيتارلىق جاعدايىن جاقسارتۋ، قوعامدىق كەڭىستىكتەردى كورىكتەندىرۋ جانە تۇرعىنداردىڭ ەكولوگيالىق مادەنيەتىن ارتتىرۋ ماقساتىندا ۇيىمداستىرىلدى.
سەنبىلىك الماتىنىڭ بارلىق سەگىز اۋدانىنداعى 12 اۋماقتا ءوتتى. تازالىق جۇمىستارىنا قالا تۇرعىندارى، مەملەكەتتىك ورگانداردىڭ، كوممۋنالدىق قىزمەتتەردىڭ، قوعامدىق ۇيىمداردىڭ وكىلدەرى، ەرىكتىلەر مەن ەكولوگيالىق بەلسەندىلەردى قوسا العاندا 7 100-دەن استام ادام قاتىستى. ءىس-شارالاردى وتكىزۋ ءۇشىن 153 بىرلىك ارنايى تەحنيكا جۇمىلدىرىلدى.
اكتسيا قورىتىندىسى بويىنشا 1 139 تەكشە مەتر قوقىس پەن قالدىق جينالىپ، شىعارىلدى.
تازالىق جۇمىستارى ۇلكەن الماتى، قارعالى، كىشى الماتى، جاربۇلاق، اقساي جانە قاراسۋ وزەندەرىنىڭ اۋماقتارىندا، سونداي-اق «وڭتۇستىك» ساياباعىندا، «ايۋساي» ۆيزيت ورتالىعىندا، العاشقى قالالىق ەكوحابتا، Green Recycle جانە Technic Destroy كاسىپورىندارىنىڭ اۋماقتارىندا جانە باسقا دا قوعامدىق كەڭىستىكتەر مەن ەكولوگيالىق نىسانداردا جۇرگىزىلدى.
الماتى قالاسىنىڭ ەكولوگيا جانە قورشاعان ورتا باسقارماسى وكىلدەرىنىڭ مالىمەتىنشە، مۇنداي ءىس-شارالار قورشاعان ورتاعا جاۋاپكەرشىلىكپەن قاراۋ مادەنيەتىن قالىپتاستىرۋعا، ەكولوگيالىق سانانى دامىتۋعا جانە تۇرعىنداردى قالانىڭ تازالىعىن ساقتاۋعا بەلسەندى تارتۋعا ىقپال ەتەدى.
