مەملەكەت باسشىسى قاسىم-جومارت توقاەۆ وزبەكستان ولي ءماجىلىسى سەناتىنىڭ توراعاسى تانزيلا نارباەۆانى قابىلدادى. بۇل تۋرالى اقوردا جازدى، دەپ حابارلايدى «ادىرنا» ءتىلشىسى.
كەزدەسۋ بارىسىندا قازاق-وزبەك ستراتەگيالىق سەرىكتەستىگى مەن وداقتاستىق قاتىناستارىنىڭ وزەكتى ماسەلەلەرى پارلامەنتارالىق بايلانىستاردى دامىتۋ تۇرعىسىنان تالقىلاندى.
پرەزيدەنت قاسىم-جومارت توقاەۆ تانزيلا نارباەۆاعا ءىلتيپات ءبىلدىرىپ، ونىڭ استاناعا ساپارى قازاقستان مەن وزبەكستان اراسىنداعى ستراتەگيالىق ىنتىماقتاستىقتىڭ ايرىقشا سيپاتتا ءوربىپ كەلە جاتقانىن راستايتىنىن اتاپ ءوتتى.
مەملەكەت باسشىسى قوس حالىق اراسىنداعى دوستىق، تاتۋ كورشىلىك بايلانىستاردى نىعايتۋعا وزبەكستان ولي ءماجىلىسى سەناتى توراعاسىنىڭ قوسقان ۇلەسىن جوعارى باعالادى.
– ءسىزدىڭ ساپارىڭىز ەلدەرىمىزدىڭ اراسىنداعى دوستىق قاتىناستاردى نىعايتۋ تۇرعىسىنان وتە ماڭىزدى. ءبىز باۋىرلاس وزبەك ەلىمەن ىنتىماقتاستىعىمىزدى دامىتۋعا ەرەكشە ءمان بەرەمىز. مۇنى ورتالىق ازيا وڭىرىندەگى تۇراقتىلىق پەن قاۋىپسىزدىكتى ساقتاۋدا وتە ماڭىزدى فاكتور دەپ سانايمىز. ەكى ەلدىڭ ىقپالداستىعى نەعۇرلىم تىعىز ءارى تابىستى وربىگەن سايىن، جالپى وڭىردەگى جاعداي دا تىنىش بولادى. ءسىزدىڭ ساپارىڭىز پارلامەنتارالىق بايلانىستى كەڭەيتۋ ءۇشىن شىن مانىندە ماڭىزدى ءرول اتقارادى، – دەدى مەملەكەت باسشىسى.
تانزيلا نارباەۆا قوناقجايلىق تانىتقانى ءۇشىن قازاقستان پرەزيدەنتىنە العىس ايتىپ، پرەزيدەنت شاۆكات ميرزيوەۆتىڭ سالەمىن جەتكىزدى.
– پرەزيدەنتىمىز سىزگە ىستىق ىقىلاسىن جولداپ، العا قويعان مىندەتتەردىڭ ءساتتى جۇزەگە اسۋىنا تىلەكتەستىك ءبىلدىردى. قول جەتكىزىلگەن ۋاعدالاستىقتاردىڭ ءبارى جەكە باقىلاۋىندا ەكەنىن ايتتى. ءبىز – پرەزيدەنتتىڭ بۇكىل كومانداسى، سونىڭ ىشىندە پارلامەنت ونى ىسكە اسىرىپ، ناقتى ناتيجەگە قول جەتكىزۋ ءۇشىن ايانباي ەڭبەك ەتەمىز. ءوزىڭىز ايتقانداي، وزبەكستان مەن قازاقستان – ءبىر-بىرىنە ەڭ جاقىن ءارى سەنىمدى سەرىكتەستەر، – دەدى وزبەكستان ولي ءماجىلىسى سەناتىنىڭ سپيكەرى.
قاسىم-جومارت توقاەۆ پەن تانزيلا نارباەۆا پارلامەنتارالىق ديپلوماتيانى، سونداي-اق ساۋدا-ەكونوميكالىق جانە ينۆەستيتسيالىق ىنتىماقتاستىقتى ودان ءارى دامىتۋ ماسەلەلەرىن تالقىلادى. مادەني-گۋمانيتارلىق بايلانىستاردى نىعايتۋعا ايرىقشا ءمان بەرىلدى.
مەملەكەت باسشىسى ورايلى ءساتتى پايدالانىپ، وزبەكستان پرەزيدەنتى شاۆكات ميرزيوەۆكە جىلى لەبىزىن جولدادى.
كەزدەسۋ سوڭىندا پرەزيدەنت قاسىم-جومارت توقاەۆ ەكىجاقتى ستراتەگيالىق سەرىكتەستىكتى تەرەڭدەتۋگە سىڭىرگەن ەڭبەگى ءۇشىن تانزيلا نارباەۆانى II دارەجەلى «دوستىق» وردەنىمەن ماراپاتتادى.
