جەردى شەتەلدىكتەرگە ساتۋعا دا، جالعا بەرۋگە دە تىيىم سالىنادى. بۇگىن ءماجىلىستىڭ جالپى وتىرىسىندا زاڭ جوباسى قابىلداندى، دەپ حابارلايدى "ادىرنا" ۇلتتىق پورتالى Tengrinews.kz-سىلتەپ.
⠀
"ەلىمىزدىڭ ەگەمەندىگىن نىعايتۋ جانە حالىقتىڭ ازىق-تۇلىك قاۋىپسىزدىگىن قامتاماسىز ەتۋ ماقساتىندا، قازاقستان ازاماتتارىنىڭ پىكىرىن ەسكەرە وتىرىپ، 2016 جىلدىڭ 6 مامىرىندا قازاقستان رەسپۋبليكاسىنىڭ پرەزيدەنتى جارلىعىمەن اۋىل شارۋاشىلىعى جەرلەرىن شەتەلدىكتەرگە، ازاماتتىعى جوق ادامدارعا، شەتەلدىك كومپانيالارعا سونداي-اق، شەتەلدىك ۇلەسى بار قازاقستاندىق كومپانيالارعا جالعا بەرۋگە، بۇدان باسقا قازاقستاننىڭ ازاماتتارى مەن زاڭدى تۇلعالارىنا اۋىل شارۋاشىلىعى جەرلەرىنە جەكە مەنشىككە بەرۋگە قاتىستى موراتوري ەنگىزىلدى. موراتوري مەرزىمى 2021 جىلدىڭ 31 جەلتوقساندا اياقتالاتىنىن ەسكەرە وتىرىپ، قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ اعىمداعى جىلى 25 اقپانداعى ۇلتتىق قوعامدىق سەنىم كەڭەسىنىڭ بەسىنشى وتىرىسىندا جەر ماسەلەسى قاشاندا حالقىمىز ءۇشىن اسا ماڭىزدى ەكەندىگىن جاريالاي وتىرىپ، شەتەلدىكتەرگە جانە شەتەلدىك زاڭدى تۇلعالارعا اۋىل شارۋاشىلىعى جەرلەرىن ساتۋعا، جالعا بەرۋگە زاڭ جۇزىندە ءبىرجولا تىيىم سالۋدى تاپسىردى", - دەيدى اۋىل شارۋاشىلىعى ءمينيسترى ساپارحان وماروۆ.
⠀
وسىعان وراي، ءتيىستى زاڭ جوباسى ازىرلەنىپ، بيىل 15 ناۋرىزدا ماجىلىسكە ەنگىزىلگەن بولاتىن. بۇگىن دەپۋتاتتارعا ۇسىنىلعان زاڭ جوباسىندا اۋىل شارۋاشىلىعى جەرلەرىن شەتەلدىكتەرگە جانە شەتەلدىك كومپانيالارعا، شەتەلدىك ۇلەسى بار قازاقستاندىق كومپانيالارعا، ازاماتتىعى جوق ادامدارعا، حالىقارالىق قاتىسۋى بار عىلىمي ورتالىقتارعا سونداي-اق، قانداستارعا بەرۋگە تولىق تىيىم سالۋ كوزدەلگەن.
"سونىمەن قاتار، زاڭ جوباسىندا بۇدان بۇرىن شەتەلدىكتەرمەن جانە شەتەلدىك ۇلەسى بار قازاقستاندىق كومپانيالارمەن جالعا الىنعان اۋىل شارۋاشىلىعى جەرلەرىنىڭ پايدالانۋ مەرزىمىن ۇزارتىلمايتىندىعى جانە ولاردىڭ پايدالانۋ مەرزىمى اياقتالعانعا دەيىن عانا يەلىكتە بولاتىنى قاراستىرىلعان", - دەدى ساپارحان وماروۆ.
زاڭ جوباسىن تالقىلاۋ اياقتالعاننان كەيىن قر پارلامەنتى ءماجىلىسىنىڭ توراعاسى نۇرلان نىعماتۋلين ماڭىزدى قۇجات ماقۇلدانعانىن ايتتى.
"مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىمەن ازىرلەنگەن قۇجاتتىڭ ناتيجەسىندە حالقىمىزدىڭ نازارىندا جۇرگەن ناقتى سۇراق بويىنشا شەشىم قابىلداندى. ەندى جەرىمىزدى شەتەلدىكتەرگە ساتۋعا دا، جالعا بەرۋگە دە تولىق تىيىم سالىنادى".
"ادىرنا" ۇلتتىق پورتالى
