پاكىستاننىڭ سولتۇستىك-باتىسىندا ەكى كۇن بويى تولاسسىز جاۋعان نوسەر مەن سۋ تاسقىنى سالدارىنان 300-دەن استام ادام كوز جۇمدى، دەپ حابارلايدى "ادىرنا" ۇلتتىق پورتالى Reuters-كە سىلتەپ.
حايبەر-پاحتۋنحۆا پروۆينتسياسىنىڭ توتەنشە جاعدايلار باسقارماسى 16 تامىز تاڭعى دەرەكتەرىنە سايكەس، 307 ادامنىڭ قازا تاپقانىن راستادى. تاۋلى جانە توبەلى اۋدانداردا ءالى دە ءىز-ءتۇزسىز كەتكەندەر بار.
ەڭ كوپ زارداپ شەككەن وڭىرلەردىڭ ءبىرى – يسلامابادتان ءۇش جارىم ساعاتتىق جولدا ورنالاسقان بۋنەر وكرۋگى. مۇندا 184 ادام قازا تاۋىپ، ينفراقۇرىلىم، ەگىستىك جەرلەر مەن جەمىس باقتارى بۇلىنگەن. بۋنەردىڭ كەي اۋداندارىندا ايەلدەر مەن بالالار قالىپ قويعان. تەك وسى ءوڭىردىڭ وزىندە 93 ادامنىڭ ءمايىتى تابىلعان.
ال شانگلا اۋدانىندا نوسەر جاۋىن سالدارىنان عيماراتتىڭ شاتىرى قۇلاپ، 34 ادام قازا بولدى.
Reuters دەرەگىنشە، ەلدىڭ پرەمەر-ءمينيسترى توتەنشە جاعداي بويىنشا شۇعىل جيىندى ءوزى باسقارىپ وتىر.
«جاقىندارىنان ايىرىلعان، زارداپ شەككەن جانە ۇيلەرى مەن كۇنكورىس كوزدەرىنەن ايىرىلعان وتباسىلارعا شىن جۇرەكتەن كوڭىل ايتامىز»، – دەدى يسحاق دار الەۋمەتتىك جەلىدەگى جازباسىندا.
