سۋ تاسقىنى سالدارىنان ەلىمىزدە 64 مىڭعا جۋىق تۇرعىن ءوز ۇيلەرىن تاستاپ، ەۆاكۋاتسيالاندى، دەپ حابارلايدى "ادىرنا" ءتىلشىسى.
اتىراۋ وبلىستىق تجد 1 ساۋىردەن بەرى تاسقىن سۋ قاۋپىنەن 26 467 ادام ەۆاكۋاتسيالانعانىن، ونىڭ ىشىندە 5 976 بالا بار ەكەنىن حابارلاعان.
سونداي-اق، قۇلسارى قالاسىندا 2 810 تۇرعىن ءۇي جانە ينفراقۇرىلىمداردى سۋ باسىپ، 12 مىڭنان استام ادام ەۆاكۋاتسيالاندى.
«قازىر جىلىوي اۋدانىنىڭ ورتالىعى – قۇلسارى قالاسىندا تاسىقان سۋدان قورعايتىن بوگەتتى نىعايتۋ جۇمىسى جالعاسىپ جاتىر. وعان جەرگىلىكتى اتقارۋشى ورگاننان 1 135-گە جۋىق، توتەنشە جاعدايلار، پوليتسيا دەپارتامەنتتەرىنىڭ، اسكەري ءبولىم قىزمەتكەرلەرى، 4640 ەرىكتىلەر مەن تۇرعىندار جۇمىلعان. بۇل جۇمىسقا 204 تەحنيكا، 6 ءجۇزۋ قۇرالى، 4 موتوپومپا تارتىلعان. تاسقىن سۋعا قارسى قۇم تولتىرىلعان 46 352 قاپ، 174 372 توننا ينەرتتى ماتەريال توسەلدى»، - دەپ حابارلادى تجد قوعاممەن بايلانىس توبى.
قۇلسارى قالاسىنا كومەككە ماڭعىستاۋ، الماتى، اقتوبە وبلىستارى توتەنشە جاعدايلار دەپارتامەنتتەرىنەن ارنايى كومەكتەر دە كەلگەن. سۋ تاسقىنى اپاتىنان سوڭ اقتوبە، قوستاناي، پاۆلودار، اقمولا، اتىراۋ جانە سولتۇستىك قازاقستان وبلىستارىندا 3391 جەكە تۇرعىن ءۇي، 1059 ساياجاي جانە 79 ءتۇرلى ماقساتتاعى عيمارات سۋ استىندا قالعان.
«قازىرگى ۋاقىتتا 63 927 ادام قۇتقارىلدى جانە ەۆاكۋاتسيالاندى، ونىڭ 45-ءى مۇمكىندىگى شەكتەۋلى ادامدار، 15 283-ءى بالالار. ۋاقىتشا ورنالاستىرۋ ورتالىقتارىندا 13 328 ادام بار، ونىڭ 6 742-ءسى بالالار. پسيحولوگتار جۇمىس ىستەۋدە. بارلىق قاجەتتى كومەك كورسەتىلۋدە. »، - دەدى قر توتەنشە جاعدايلار مينيسترلىگىنىڭ توتەنشە جاعدايلاردى جويۋ دەپارتامەنتىنىڭ باسشىسى قاھارمان ورازالين بريفينگ بارىسىندا.
