قازاقستان قىرعىزستاندا شيپاجاي سالىپ جاتىر. بۇل تۋرالى پرەمەر-مينيستر ولجاس بەكتەنوۆ مالىمدەپ، قىرعىزستانداعى قازاقستاندىق شيپاجايلاردىڭ قۇرىلىس بارىسىمەن تانىستى، دەپ حۆبارلايدى “ادىرنا”.
شولپان-اتا قالاسىندا پرەمەر-مينيستر «قازاقستان» شيپاجايىنىڭ جاڭا عيماراتىنىڭ قۇرىلىس الاڭىندا بولدى. شيپاجايدىڭ دەمونتاجداۋ جانە قۇرىلىس ورىنىن دايىنداۋ جۇمىستارى اياقتالعان، نەگىزگى كورپۋستاردىڭ، كوتتەدجدەر مەن شارۋاشىلىق بلوكتاردىڭ ىرگەتاسى مەن ءمونوليتتى قاڭقاسىن سالۋ جالعاسىپ جاتىر.
سونداي-اق 500 ورىندىق «سامال» دەمالىس ۇيىنە جاڭعىرتۋ جۇمىستارىن جۇرگىزۋ جوسپارلانعان. قازىردىڭ وزىندە ينۆەستور انىقتالىپ، ينۆەستيتسيالىق كەلىسىمنىڭ جوباسى دايىندالىپ، جىل بويى جۇمىس ىستەيتىن 3-4 جۇلدىزدى زاماناۋي قوناق ءۇي سالۋ ءۇشىن جوبالاۋ-سمەتالىق قۇجاتتاما ازىرلەنىپ جاتىر.
بوستەري (ىستىقكول وبلىسى) اۋىلىنداعى «ۋنيۆەرسيتەت» سپورتتىق-ساۋىقتىرۋ لاگەرى بويىنشا كۋرورتتىق-رەكرەاتسيالىق ايماقتى دامىتۋ تۇجىرىمداماسى ازىرلەنىپ، نىساندى رەكونسترۋكتسيالاۋ بويىنشا ينۆەستورلارمەن كەلىسسوزدەر جۇرگىزىلىپ جاتىر. بۇل نىسان بازاسىندا قازاقستاندىق سپورتشىلاردى جاتتىقتىرۋعا ارنالعان سپورتتىق ينفراقۇرىلىم – سپورت زالدارى، باسسەيندەر جانە تاعى باسقا نىساندار سالىنادى.
سونداي-اق قازاقستاندىق ينۆەستورمەن بىرلەسىپ «وليمپ» سپورتتىق-ساۋىقتىرۋ ورتالىعىن جوندەۋ، جۇمىس ىستەپ تۇرعان نىسانداردى رەكونسترۋكتسيالاۋ جانە قوسىمشا سپورت عيماراتتارىن سالۋ ماسەلەسى پىسىقتالىپ جاتىر.
