Ǧylym jäne joǧary bılım ministrı Saiasat Nūrbek Oŋtüstık Qazaqstan universitetıne şorty kigenı üşın kıre almaǧan qyzdyŋ jaǧdaiyna bailanysty pıkır bıldırdı. Būl oqiǧa Threads jelısınde taraǧan bolatyn, dep habarlaidy “Adyrna”.
Qyzdyŋ aituynşa, qasyndaǧy qūrbysyn şorty kiıp kelgenı üşın küzetşıler dekanatqa ötkızbegen.
“Qatty taŋǧalyp otyrmyn. Oŋtüstık Qazaqstan memlekettık universitetıne dekanatqa pechat qoidyru üşın kelgenbız. Janymdaǧy qyzdy ötkızbedı. Küzetşıler “Universitettıŋ zaŋy solai, sen būlai kırseŋ, bız qaraimyz” deidı. Küzetşı aǧaidyŋ özı solai aityp tūr. Būl joǧary oqu orny, eşkım aşyq-şaşyq kiınıp tūrǧan joq, bärı jinaqy. Sonyŋ özınde osylai aityp tūr. Taŋdanyp tūrmyn. Jalpy mūndai zaŋ bar ma?” – dedı boijetken.
Būl saualǧa ministr Saiasat Nūrbek bylai jauap berdı:
"Şynymen de kiımge qatysty jeke talaptar joq. Mūnda orta bılımnen özgeşe. Uniforma nemese kiım elementterıne qoiylatyn talaptar joq. Qazır bız bır jaǧynan küzetşınıŋ syrtqy türge qatysty tüsınıksız äreketterın qarastyramyz. Universitette syrtqy türge qoiylatyn talaptar bar ma, sony da anyqtaimyz", – dedı ol.
Ministrdıŋ aituynşa, joǧary bılım jüiesı aşyq ärı demokratiialyq.
"Özım de Amerikada oqyǧanda şorty kiıp jürdım, mūny jasyratyn eşteŋe joq. Amerikadan kelgen soŋ Evraziialyq universitette de şortymen jürdım. Bärı "qaraŋyzdar, amerikalyq keldı" dep jügırıp jürdı. Sondyqtan bız qataŋ talaptar qoimaimyz", – dep basa aitty ol.
Sonymen bırge ministrdıŋ aituynşa, universitet qoǧamdyq oryn bolǧandyqtan, oqu oryndary özderınıŋ ışkı standarttary men kiım kodeksın belgılei alady.
