Jūmysşy mamandyqtar jyly aiasynda eldıŋ öndırıstık ortalyǧy — Jezqazǧan qalasynda öŋırdıŋ eŋ köne tehnikalyq oqu oryndarynyŋ bırı Jezqazǧan joǧary politehnikalyq kolledjıne arnalǧan baspasöz tury öttı.
Is-şaranyŋ maqsaty — tehnikalyq jäne käsıptık bılım berudıŋ jastarǧa tabysty mansapqa jol aşatynyn körsetu. 72 jyldyq tarihy bar būl bılım ordasy — Ūlytau öŋırınıŋ negızgı kadr daiarlau ortalyǧy. Mūnda studentter tek jūmysşy mamandyǧyn meŋgerıp qana qoimai, zamanaui öndırıstık täjıribe alyp, eŋbek naryǧynda sūranysqa ie maman bolyp şyǧady.
Kolledj missiiasy — bılım beru, zertteu jäne innovasiialyq ortany qalyptastyra otyryp, halyqaralyq standarttarǧa sai sapaly käsıptık oqytudy qamtamasyz etu.
Baspasöz tury aiasynda qatysuşylar kolledjdıŋ 3 korpusyn, 32 oryndyq jataqhanasyn, sport keşenın, ashanasyn jäne «Building & Energy» qūzyrettılık ortalyǧyn aralady. «Jas maman» jobasy aiasynda jabdyqtalǧan dänekerleu, slesarlyq, elektrmontaj, sändık sylaq, aǧaş öŋdeu jäne özge de şeberhanalar jūmysymen tanysyp, «Qazaqmys» korporasiiasynyŋ öndırıstık alaŋynda dualdı oqytu prosesın kördı. Kolledjdıŋ tabysty tülekterımen jüzdestı.
Kolledjde metallurgiia, baiytu, IT, avtomattandyru, qūtqaru ısı, energetika jäne qūrylys baǧyttary boiynşa 11 özektı mamandyq oqytylady. 23 oqu kabinetı, 12 zerthana, 8 şeberhana zamanaui talaptarǧa sai jabdyqtalǧan. 61 bılıktı oqytuşynyŋ 19-y WorldSkills standarttary boiynşa daiarlyqtan ötken. 2024–2025 oqu jylynda kolledj bazasynda ötken «WorldSkills Ulytau 2025» chempionatynda studentter bırneşe qūzyrettılık boiynşa jüldelı oryndarǧa ie boldy. Dualdı oqytu jäne öndırıstık täjıribe «Qazaqmys», Kazakhmys Energy jäne öŋırdıŋ 15-ten astam käsıpornynda jüzege asyrylady. Oqytuşylar Skills Enbek platformasynda sūranysqa ie daǧdylardy üiretetın avtorlyq onlain kurstar äzırleudı qolǧa alǧan.
Käsıptık baǧdar men mansaptyq qoldau:
Kolledj «Mansap kompasy» platformasy arqyly käsıbi baǧdar berıp, «Aşyq esık» künderı, mamandyqtar järmeŋkelerı, forumdar men kezdesuler arqyly talapkerler men tülekterge naqty jūmysqa ornalasu mümkındıkterın ūsynady.
Kolledjdıŋ ırgetasy 1953 jyly qalanǧan. 2020 jyly «Joǧary kolledj» märtebesın alyp, «Jas maman» respublikalyq jobasynyŋ grant iegerı atandy. Bügınde zamanaui tehnikalyq bazaǧa, joǧary bılıktı pedagogikalyq qūramǧa ie jäne öŋırdıŋ äleumettık-ekonomikalyq damuyna belsendı üles qosyp otyr.
