جۇمىسشى ماماندىقتار جىلى اياسىندا قازاقستاننىڭ باستاماسىمەن ۇيىمداستىرىلعان العاشقى TurkicSkills 2025 كاسىبي شەبەرلىك چەمپيوناتى كوللەدجدەر مەن بيزنەس قاۋىمداستىق ءۇشىن ماڭىزدى ىنتىماقتاستىق الاڭىنا اينالدى.
چەمپيونات اياسىندا كوللەدجدەر كاسىپورىندارمەن، شەتەلدىك كوللەدجدەرمەن 100-گە جۋىق ىنتىماقتاستىق مەموراندۋمىنا قول جەتكىزدى. ولار تەحنيكالىق جانە كاسىپتىك ءبىلىم بەرۋ جۇيەسىنە جاڭا تەحنولوگيالاردى، يننوۆاتسيالىق جوبالاردى، زاماناۋي وقىتۋ ادىستەمەلەرىن ەنگىزۋگە، WorldSkills قوزعالىسىن دامىتۋعا، تاجىريبە الماسۋعا، سونداي-اق بىرلەسكەن جوبالار مەن شەبەرلىك سىنىپتارىن ۇيىمداستىرۋعا باعىتتالعان.
«بۇل كەلىسىمدەر ستۋدەنتتەرىمىزگە كاسىبي داعدىلارىن جەتىلدىرۋگە، حالىقارالىق ستاندارتتارعا سايكەس تاجىريبە جيناقتاۋعا جانە ەڭبەك نارىعىندا ءوز ورنىن تابۋعا جاڭا مۇمكىندىكتەر اشادى. سونىمەن قاتار، ءبىلىم بەرۋ ساپاسىن ارتتىرۋعا جانە زاماناۋي ءوندىرىس تالاپتارىنا ساي بىلىكتى ماماندار دايارلاۋعا باعىتتالعان ماڭىزدى قادام بولىپ تابىلادى»، — دەيدى «Talap» كەاق پرەزيدەنتى سانجار تاتىبەكوۆ.
اتاپ ايتار بولساق، وقۋ-اعارتۋ مينيسترلىگىنىڭ «Talap» كوممەرتسيالىق ەمەس اكتسيونەرلىك قوعامى روبوتوتەحنيكا سالاسىندا «Dosti» كومپانيالار توبى جشس تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋدى دامىتۋ ماقساتىندا ءوزارا ىنتىماقتاستىق تۋرالى مەموراندۋمعا قول قويدى. سونىمەن قاتار، ح. وزبەكقاليەۆ اتىنداعى ماڭعىستاۋ جوعارى پوليتەحنيكالىق كوللەدجى مەن «KidsGo Technology Ltd.» كومپانياسى اراسىندا اقپاراتتىق تەحنولوگيالار، جاساندى ينتەللەكت، روبوتوتەحنيكا جانە تسيفرلىق ءبىلىم بەرۋ باعدارلامالارى سالاسىندا ىنتىماقتاستىق ورناتىلدى.
ايتا كەتەيىك، حالىقارالىق TurkicSkills 2025 كاسىبي شەبەرلىك چەمپيوناتىنا قازاقستان، تۇركيا، ازەربايجان، ماجارستان، وزبەكستان جانە قىرعىزستان ەلدەرىنەن 16-22 جاس ارالىعىنداعى 70-كە جۋىق ستۋدەنت پەن جاس مامان، سونداي-اق 90-عا جۋىق جوعارى بىلىكتى ساراپشى قاتىسۋدا.
