جامبىل وبلىسىندا مۇعالىمدەردىڭ اقشاسىنا شاقىرتىلدى دەلىنگەن ەمشىنى قۇرمەتپەن قارسى العان تۇرار رىسقۇلوۆ اۋدانى تەرەڭوزەك اۋىلىنداعى مەكتەپتە ارنايى تەكسەرىس جۇرگىزىلدى، - دەپ حابارلايدى “ادىرنا” ۇلتتىق پورتالى.
تەكسەرۋ جۇمىستارىن جامبىل وبلىسىنىڭ بالالاردىڭ قۇقىقتارىن قورعاۋ جونىندەگى ۋاكىلى مەن جامبىل وبلىسى اكىمدىگىنىڭ ءبىلىم ساپاسىن قامتاماسىز ەتۋ دەپارتامەنتىنىڭ قىزمەتكەرلەرى جۇرگىزدى.
ءبىلىم، اقپارات جانە الەۋمەتتىك دامۋ باسقارمالارىنىڭ قىزمەتكەرلەرىنەن قۇرالعان جۇمىس توبى دا تەكسەرۋ جۇمىستارىنا قاتىستى.
تەكسەرۋ قورىتىندىسى بويىنشا تۇرار رىسقۇلوۆ اۋدانى اكىمىنىڭ ورىنباسارى ا.تەرلىكباەۆ مەن جامبىل اتىنداعى مەكتەپ ديرەكتورى ە.زاكىمباەۆ ءوز وتىنىشتەرى بويىنشا قىزمەتىنەن بوساتىلعان.
تۇرار رىسقۇلوۆ اۋداندىق ىشكى ساياسات ءبولىمىنىڭ باسشىسى مەن تەرەڭوزەك كەنتىنىڭ اكىمىنە قاتاڭ سوگىس تۇرىندەگى تارتىپتىك جازا قولدانىلعان.
ەسكە سالايىق، بۇعان دەيىن جەلىدە تەرەڭوزەك اۋىلىنداعى ورتا مەكتەپتە وتكەن شارادان ءساندى كويلەك كيىپ، تاجگە ۇقساس باس كيىم كيگەن ايەل بەينەلەنگەن ۆيدەو پايدا بولدى. ونى مەكتەپتە كينو جۇلدىزىنداي قارسى العان: ادامدار جولدىڭ ەكى جاعىنا ءتىزىلىپ، ال مەكتەپ وقۋشىلارى ونىڭ كويلەگىن كوتەرىپ جۇرگەن. باسقا كادرلاردا سول ايەلدىڭ سىنىپقا قالاي كىرگەنى جانە ونىڭ اياعىنا راۋشان گۇلدەرىن تاستاپ جاتقانى كورسەتىلگەن.
ۆيدەودا توميريس پاتشايىمىنىڭ بەينەسىن سومداعان گۇلسارا كوپباەۆا كورسەتىلگەنى اتاپ ءوتىلدى. ول ءبىر كەزدەرى ءوزى بىتىرگەن مەكتەپكە قايىرىمدىلىق كومەك كورسەتۋ ءۇشىن كەلگەن.
قوناقتى لايىقتى قارسى الۋ ءۇشىن ۇستازداردان ءتورت مىڭ تەڭگە جينالىپ، ءتىپتى ەمشىنىڭ قۇرمەتىنە كونتسەرت تە ۇيىمداستىرىلعانى ايتىلدى.
