Qazaqstan Premer-ministrınıŋ orynbasary Qanat Bozymbaev 2024 jyldyŋ jeltoqsanynda Aqtauda oryn alǧan AZAL äue kompaniiasynyŋ ūşaǧy apatyna qatysty tergeudıŋ barysy turaly pıkır bıldırdı, dep habarlaidy “Adyrna”.
Onyŋ aituynşa, kölık ministrlıgı apattyŋ sebepterın anyqtau üşın halyqaralyq sarapşylardy tarta otyryp, belsendı jūmys jürgızıp jatyr. Apatqa ūşyraǧan ūşaqtyŋ keibır jabdyqtary şetelde saraptamadan ötude, al taldau kezeŋı aiaqtaluǧa jaqyn. Jaqyn arada tüpkılıktı eseptı daiyndau bastalady.
Bozymbaevtyŋ aituynşa, apatqa qatysty jalǧyz aşyq sūraq – fiuzeliajdyŋ zaqymdanu sipatyna bailanysty.
«Men onyŋ qalai zaqymdanǧany turaly saiasi pıkır aitqym kelmeidı. Būl sūraqtarǧa qūqyq qorǧau organdary jürgızıp jatqan jarylys-tehnikalyq saraptama jauap beruı tiıs. Menıŋ bıluımşe, olar ärtürlı zaqymdaityn elementterı bar qaru-jaraq qoldanysta bolatyn elderge sūrau jıberdı. Ondai elementter qūlaǧan ūşaqtyŋ fiuzeliajynan tabyldy. Bızdıŋ oiymyzşa, jyldyŋ soŋyna deiın şyndyq tolyq anyqtalady», – dedı vise-premer.
Ol tergeu QR Kölık ministrlıgı janynan qūrylǧan komissiia aiasynda jürgızılıp jatqanyn jäne oǧan Äzerbaijan, Resei elderınıŋ, sondai-aq ūşaq öndıruşısı Embraer kompaniiasynyŋ mamandary qatysyp jatqanyn atap öttı.
Bozymbaev tergeu aşyq jürıp jatqanyn, eşqandai qūpiia joq ekenın aitty. Şeteldık sarapşylar Astana men Aqtauǧa tūraqty türde kelıp, bırlesıp jūmys ısteude. Onyŋ aituynşa, halyqaralyq serıktestermen üilestırude eşqandai qiyndyqtar joq, barlyq jūmystar aşyq atqarylyp jatyr.
Vise-premer halyqty sabyr saqtauǧa şaqyryp, tüpkılıktı esep bırneşe aidan keiın jariialanatynyn aitty.
2025 jyldyŋ aqpan aiynyŋ basynda qazaqstandyq vedomstvonyŋ aldyn ala esebı jariialanǧan. Onda fiuzeliajdyŋ qūiryq bölıgınde, tık qanat pen tūraqtandyrǧyşta, biıktık pen baǧyt rulialarynda «köptegen tesıp ötken jäne tesıp ötpegen zaqymdanular» sipattalǧan. Keibır jerlerde zaqymdanulardyŋ tıkbūryşty pışını bar ekenı körsetılgen, būl syrtqy nysandardyŋ engenın körsetuı mümkın.
Keiınırek Reuters agenttıgı derekközge sılteme jasap, ūşaqty Reseidıŋ «Pansir-S» zymyrany atyp tüsırgenın habarlady. Būl aqparatty Äzerbaijan bilıgı rastady, sebebı olardyŋ qolynda zymyrannyŋ synyǧy qalǧan. Olar Resei bilıgı būl oqiǧaǧa qatysy baryn joqqa şyǧaryp, kınänı ekipajǧa jükteuge tyrysyp jatyr dep mälımdep, Reseige qarsy sotqa şaǧym daiyndap jatqanyn aitty.
