ۇكىمەتتەگى ءباسپاسوز كونفەرەنتسياسىندا توتەنشە جاعدايلار ۆيتسە-ءمينيسترى كەگەن تۇرسىنباەۆ الماتى وبلىسىندا جوعالىپ كەتكەن اسكەري تىكۇشاققا قاتىستى سوڭعى مالىمەتتەرمەن ءبولىستى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، 25 شىلدەدە قورعانىس مينيسترلىگىنەن وتىرار اۋدانى ماڭىندا تىكۇشاقتىڭ جوعالعانى تۋرالى اقپارات تۇسكەن. سول كۇننەن باستاپ جەدەل ىزدەستىرۋ جۇمىستارى باستالعان. تىكۇشاقتار ارقىلى ايماقتى شولۋ جۇرگىزىلىپ، سوربۇلاق سۋ قويماسى مۇقيات تەكسەرىلگەن.
"قازكوسموس" سپۋتنيكتىك سۋرەتتەرىندە جانار-جاعارماي ىزىنە ۇقساس بەلگىلەر انىقتالعان. كەيىن ءدال وسى اۋماقتان تىكۇشاقتىڭ بىرنەشە بولشەگى تابىلعان. وسىعان بايلانىستى ارنايى جەدەل شتاب قۇرىلىپ، ىزدەۋ جۇمىستارى كۇشەيتىلدى.
«قازىرگى ۋاقىتتا سوربۇلاق اۋماعىنىڭ 50 پايىزى زەرتتەلدى. سۋ قويماسىنىڭ تەرەڭدىگى 5-تەن 25 مەترگە دەيىن، ال ءتۇبى – باتپاقتى جانە لايلى. كەيبىر تۇستاردا 1 مەتر تەرەڭدىكتىڭ وزىندە كورىنۋ مۇمكىن ەمەس»، – دەدى كەگەن تۇرسىنباەۆ.
ىزدەۋ جۇمىستارى قورعانىس مينيسترلىگىنىڭ ۇيلەستىرۋىمەن، كۇن شىققاننان كۇن باتقانعا دەيىن جۇرگىزىلىپ جاتىر. توتەنشە جاعدايلار مينيسترلىگى دە ءوز رەسۋرستارىن جۇمىلدىرىپ وتىر.
ەسكە سالايىق، 2025 جىلعى 25 شىلدەدە قارۋلى كۇشتەردىڭ اۋە قورعانىس كۇشتەرىنە تيەسىلى EC-145 تىكۇشاعى جوسپارلى ۇشۋ كەزىندە رادارلاردان جوعالىپ كەتكەن بولاتىن. وقيعاعا قاتىستى تەرگەۋ جالعاسۋدا.
