قاتاڭ رەجيمدەگى زارەچنىي تۇرمەسىندە 22 جىلىن وتكىزگەن سەرىك قاليەۆ بوستاندىققا شىقتى، دەپ حابارلايدى "ادىرنا" ۇلتتىق پورتالى Orda.kz-كە سىلتەپ.
ونى اباقتى الدىندا تۋعان-تۋىستارى قارسى الىپ، الماتىعا الىپ كەتكەن.
سەرىك قاليەۆ – حالىقارالىق دارەجەدەگى سپورت شەبەرى، گەننادي گولوۆكين، سەرىك ساپيەۆ جانە ۆاسيلي جيروۆ سياقتى اتاقتى بوكسشىلاردىڭ بۇرىنعى باپكەرى. ول 2004 جىلى الماتىداعى جارىلىس وقيعاسىنا بايلانىستى سول كەزدەگى بوكس فەدەراتسياسىنىڭ پرەزيدەنتى، ەلباسىنىڭ قۇداسى اسقار قۇلىباەۆقا قاستاندىق جاساماق بولدى دەگەن ايىپپەن 25 جىلعا باس بوستاندىعىنان ايىرىلعان. كەيىن بۇل جازا 22 جىلعا قىسقارتىلعان.
قاليەۆ تاعىلعان ايىپتاردى ەشقاشان مويىنداماعان. ادۆوكاتى ايمان وماروۆانىڭ ايتۋىنشا، ءىس بويىنشا سوت شەشىمى داۋلى بولعان، ال تەرگەۋ پروتسەسىندە كوپتەگەن كۇماندى جايتتار تىركەلگەن.
"ول 22 جىل بويى ۇلىن، نەمەرەلەرىن كورمەي، اۋىر سىناقتان ءوتتى. تۇرمەدە س گەپاتيتىمەن اۋىرىپ، دەنساۋلىعى ناشارلادى. الايدا شارتتى تۇردە مەرزىمىنەن بۇرىن بوساتۋ تۋرالى ون رەت بەرگەن ءوتىنىشى قاناعاتتاندىرىلمادى", — دەيدى وماروۆا.
سەرىك قاليەۆ جازاسىن الدىمەن ستەپنوگورسك پەن اتباسار قالالارىندا وتەگەن. سوڭعى بىرنەشە ايدا ول الماتى وبلىسىنداعى زارەچنىي تۇرمەسىنە اۋىستىرىلعان بولاتىن. ادۆوكاتتىڭ سوزىنشە، قاليەۆ ءوزىن «توزاقتان قايتىپ كەلگەندەي» سەزىنەدى.
