Qataŋ rejimdegı Zarechnyi türmesınde 22 jylyn ötkızgen Serık Qaliev bostandyqqa şyqty, dep habarlaidy "Adyrna" ūlttyq portaly Orda.kz-ke sıltep.
Ony abaqty aldynda tuǧan-tuystary qarsy alyp, Almatyǧa alyp ketken.
Serık Qaliev – halyqaralyq därejedegı sport şeberı, Gennadii Golovkin, Serık Säpiev jäne Vasilii Jirov siiaqty ataqty boksşylardyŋ būrynǧy bapkerı. Ol 2004 jyly Almatydaǧy jarylys oqiǧasyna bailanysty sol kezdegı Boks federasiiasynyŋ prezidentı, Elbasynyŋ qūdasy Asqar Qūlybaevqa qastandyq jasamaq boldy degen aiyppen 25 jylǧa bas bostandyǧynan aiyrylǧan. Keiın būl jaza 22 jylǧa qysqartylǧan.
Qaliev taǧylǧan aiyptardy eşqaşan moiyndamaǧan. Advokaty Aiman Omarovanyŋ aituynşa, ıs boiynşa sot şeşımı dauly bolǧan, al tergeu prosesınde köptegen kümändı jaittar tırkelgen.
"Ol 22 jyl boiy ūlyn, nemerelerın körmei, auyr synaqtan öttı. Türmede S gepatitımen auyryp, densaulyǧy naşarlady. Alaida şartty türde merzımınen būryn bosatu turaly on ret bergen ötınışı qanaǧattandyrylmady", — deidı Omarova.
Serık Qaliev jazasyn aldymen Stepnogorsk pen Atbasar qalalarynda ötegen. Soŋǧy bırneşe aida ol Almaty oblysyndaǧy Zarechnyi türmesıne auystyrylǧan bolatyn. Advokattyŋ sözınşe, Qaliev özın «tozaqtan qaityp kelgendei» sezınedı.
