تانىمال قازاقستاندىق ورىنداۋشى Jah Khalib (باحتيار مامەدوۆ) قازاقستانداعى تۋر اياسىنداعى كونتسەرتتەرىن كەيىنگە قالدىرۋعا نەمەسە تولىقتاي توقتاتۋعا ءماجبۇر ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
بۇل تۋرالى ءانشى الەۋمەتتىك جەلىدەگى پاراقشاسىندا حابارلادى.
مۋزىكانتتىڭ سوزىنشە، جاڭا تۋعان قىزى كۇردەلى وتادان كەيىن اۋىر حالدە جانساقتاۋ بولىمىندە جاتىر.
"وكىنىشكە قاراي، تۋردى توقتاتۋعا نەمەسە كەيىنگە شەگەرۋگە ءماجبۇرمىن (ەگەر كۇتۋگە دايىن بولساڭىزدار). قىزىم وتادان كەيىن وتە اۋىر جاعدايدا جاتىر. قانشا تىرىسسام دا، ساحناعا شىعۋعا شامام جوق", — دەپ جازدى ول.
Jah Khalib ءدال قازىرگى ساتتە وتباسىمەن بىرگە بولۋدىڭ ماڭىزدىلىعىن اتاپ ءوتتى. ول جۇبايىنا قولداۋ كورسەتىپ، قىزىن امان الىپ قالۋ ءۇشىن جانىنان تابىلعىسى كەلەتىنىن جەتكىزدى.
"قازىر ەڭ باستىسى – جانۇيامنىڭ جانىندا بولۋ. جۇبايىما دەمەۋ بولىپ، بالاپانىم ءۇشىن دۇعا ەتەمىن. سىزدەردەن دە قولداۋ سۇرايمىن – اركىم ءوز مۇمكىندىگىنشە بالالارىمىزدىڭ اماندىعى ءۇشىن دۇعا ەتسە ەكەن", — دەدى ءانشى.
