ازەربايجاندا قۇرمانعازى ورتالىعى اشىلادى، دەپ حابارلايدى "ادىرنا" ءتىلشىسى.
مەملەكەت باسشىسىنىڭ ازەري-پرەسس اگەنتتىگىنە بەرگەن سۇحباتىندا الداعى جوسپارلارىمەن ءبولىستى.
ءجۋرناليستىڭ "باۋىرلاس قازاقستان الداعى ۋاقىتتا ەلىمىزدە تاعى قانداي جوبالاردى جۇزەگە اسىرۋدى جوسپارلاپ وتىر؟" دەگەن سۇراعىنا توقاەۆ جاۋاپ بەردى.
ء"بىز قازىردىڭ وزىندە قاراباقتىڭ قانشالىقتى سەرپىندى تۇردە جاندانىپ جاتقانىن كورىپ وتىرمىز. بۇل وڭىردە كوپتەگەن جۇمىستار اتقارىلۋدا. كولىك، الەۋمەتتىك جانە تۋريزم ينفراقۇرىلىمى بەلسەندى دامىپ، اۋەجايلار، قوناق ۇيلەر، تۇرعىن ۇيلەر مەن مەكتەپتەر سالىنۋدا. ارينە، بۇل يگىلىكتى ىستەن ءبىز دە قالىس قالا المادىق.
2022 جىلدىڭ تامىز ايىندا باكۋگە بارعان ساپارىمدا بالالار شىعارماشىلىق ورتالىعىنىڭ قۇرىلىسى تۋرالى حابارلاعان بولاتىنمىن. قازاق حالقىنىڭ ازىربايجانعا تارتۋى رەتىندە فيزۋليدە قۇرمانعازى اتىنداعى ورتالىق اشىلادى. مەنىڭ قازىرگى ساپارىمنىڭ باعدارلاماسىندا وسى ورتالىقتىڭ رەسمي اشىلۋى قاراستىرىلعان. بۇل مەكەمە ەلدەرىمىز بەن حالىقتارىمىزدىڭ دوستىعىنىڭ، باۋىرلاستىعىنىڭ جانە ءوزارا قولداۋىنىڭ تاعى ءبىر سيمۆولىنا اينالارى ءسوزسىز", - دەدى پرەزيدەنت.
ودان بولەك قاسىم-جومارت توقاەۆ الداعى ۋاقىتتا قازاقستان مەن ءازىربايجان جاڭا جوبالاردى جۇزەگە اسىراتىنىن ايتتى.
"بۇعان قوسا، قازاقستان ءازىربايجان مەن ارمەنيا اراسىنداعى بەيبىت كەلىسىمنىڭ تەزىرەك جاسالۋىنا مۇددەلى ەكەنىن اتاپ وتكىم كەلەدى.
قازاقستان حالىقارالىق بىتىمگەرشىلىك باستامالاردىڭ باستاماشىسى جانە قولداۋشىسى رەتىندە بۇكىل ەۋرازيالىق ايماقتىڭ بەيبىت جانە تۇراقتى دامۋىنا باعىتتالعان كەز كەلگەن كۇش-جىگەردى قولداۋعا دايىن", - دەدى پرەزيدەنت.
قازاقستان پرەزيدەنتىنىڭ تاپسىرماسىمەن سالىنىپ جاتقان عيمارات قۇرىلىسى اياقتالۋعا جاقىن.
