قازاقستاندا بەلگى تاعىلعان العاشقى قارا قۇماي ءۇندىستاندا ءولى تابىلعانى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
مالىمەتكە سايكەس، جىرتقىش قۇستاردىڭ كوشى-قون باعىتتارىن باقىلاۋعا ارنالعان حالىقارالىق باعدارلاما اياسىندا قازاقستاندا بەلگى تاعىلعان جاس قارا قۇماي قىسقى ماۋسىمدا ءۇندىستاننىڭ رادجاستحان شتاتىنا ۇشىپ بارعان. قۇس دجودحپۋر قالاسىنا قاراستى دجۋديا اۋىلىندا جوسپارلى دالالىق تەكسەرۋ كەزىندە ءولى كۇيىندە تابىلعان.
قارا قۇمايعا سپۋتنيكتىك ماياك 2024 جىلعى 24 شىلدەدە ورناتىلعان. بۇل قۇرىلعى ورتالىق ازيا مەن ءۇندى سۋبكونتينەنتى اراسىنداعى الىس كوشى-قون باعىتتارىن باقىلاۋ ماقساتىندا تاعىلعان. قۇس وسى باعىت بويىنشا ەكى رەت ۇشىپ بارىپ، قايتا ورالعان. الايدا ءۇشىنشى قىسقى ساپارى كەزىندە قازا تاپقان.
تابيعاتتى قورعاۋشىلاردىڭ الدىن الا بولجامىنشا، جىرتقىش قۇس اۋىل شارۋاشىلىعى جانۋارىنىڭ ولەكسەسىن جەپ، ۋلانىپ ولگەن بولۋى مۇمكىن. مامانداردىڭ ايتۋىنشا، مالعا ولەر الدىندا تىيىم سالىنعان ۆەتەرينارلىق اۋىرسىنۋدى باساتىن ءدارى سالىنعان بولۋى ىقتيمال. مۇنداي پرەپاراتتار وڭتۇستىك ازيادا قۇمايلاردىڭ جاپپاي قىرىلۋىنا سەبەپ بولاتىن نەگىزگى قاۋىپتەردىڭ ءبىرى سانالادى.
تەكسەرۋ بارىسىندا تابيعات قورعاۋشىلارى قۇستىڭ جەكە باسىن راستايتىن سايكەستەندىرۋ ساقيناسىن تاپقان. الايدا سپۋتنيكتىك ماياك تابىلماعان. مامانداردىڭ ايتۋىنشا، قۇس شامامەن ءبىر اپتا بۇرىن ولگەن بولۋى مۇمكىن، ال ونىڭ دەنەسى قاتتى ىدىراپ كەتكەن. قالدىقتارىنىڭ باسىم بولىگىن جابايى جانۋارلار جەپ قويعان.
