دۋبايعا جۇمىس ىستەۋگە كەتكەن قازاقستاندىق ازامات جوعالىپ كەتتى. ءبۇل تۋرالى LIFE09 اقپارات اگەنتتىگى جازدى، دەپ حابارلايدى “ادىرنا” ۇلتتىق پورتالى.
قازبەكوۆ يسلامبەك 2022 جىلدىڭ قىركۇيەك ايىندا دۋباي قالاسىنا جۇمىس ىستەۋگە كەتكەن. بىراق جىل سوڭىنا قاراي يسلامبەك دوستارىنا بەلگىسىز ادامداردىڭ ايتۋىمەن تايلاندقا اۋىسقانىن ايتقان. كەيىننەن تايلاند، لاوس، ميانما ەلدەرىمەن شەكتەسەتىن «زولوتوي ترەۋگولنيك» دەگەن جەرگە الدانىپ كەلگەنىن مالىمدەگەن. بىراق 27 جەلتوقساننان بەرى بايلانىسقا شىقپاعان.
جوعالعان ازامات سوڭعى حابارلاماسىندا تۇسىنىكسىز ءجايتتاردىڭ بولىپ جاتقانىن دوستارىنا ەسكەرتىپتى.
«زولوتوي ترەۋگولنيك» دەگەن جەرگە كەلگەنشە 10 پوستان وتتىك. قايدا تاپ بولعانىمدى سوندا كەلگەندە عانا ءتۇسىندىم. جانىمدا 1 قازاقستاندىق جىگىت، 2 پاكىستاندىق جانە تاعى ءبىر ادام بار. بىزگە باسىندا اۋدارماشى بولاسىڭدار دەگەن، كەيىننەن ساتۋ جۇمىستارىمەن اينالىساسىڭدار دەدى. ساتۋدان قاجەتتى اقشانى تاپپاساڭدار، اقشانى وزدەرىڭ تولەيسىڭدەر دەپ ايتتى. ال ول اقشانى وتەپ بەرە الماساڭ ۇرامىز، قۇلدىققا سالامىز، تۇرمەگە قامايمىز دەيدى. ەندى ءبىر امال بولسا، قايتىپ كەتۋگە تىرىسامىز. ەگەر مەنەن حابار ءۇزىلىپ قالسا، جاعدايدىڭ قيىنداعانى دەپ تۇسىنىڭدەر» دەلىنگەن جوعالعان جىگىتتىڭ سوڭعى حابارلاماسىندا.
جوعالعان قازاقستاندىق ازاماتتىڭ دوستارىنىڭ ايتۋىنشا يسلامدى قۇلدىقتا ۇستاپ وتىرۋى مۇمكىن دەيدى.
مەملەكەتتىك ورگاندار جوعالعان ازامات تۋرالى قانداي دا ءبىر اقپارات ءبىلۋ ءۇشىن جۇمىس ىستەۋدە. اتالعان جەردە زاڭنىڭ كۇشى اسا جۇرە بەرمەيدى. بۇرىنعى تاجىربيەلەر كورسەتكەندەي، ول ەلدەردە وسىنداي جاعدايعا تاپ بولعان ادامداردى قايتارۋ ءۇشىن قوماقتى قارجى سۇرايدى.
