مادەنيەت جانە اقپارات مينيسترلىگى ازاماتتىق كەلىسىمدى نىعايتۋ جانە ەتنوسارالىق قاتىناستاردى دامىتۋ باعىتىنداعى جۇمىستاردى جالعاستىرۋدا.
2025 جىلدىڭ ءبىرىنشى جارتىجىلدىعىنىڭ قورىتىندىسى بويىنشا 95%-دان استام رەسپوندەنت ەلدەگى ەتنوسارالىق قاتىناستاردى تۇراقتى ءارى قولايلى دەپ سيپاتتاعان.
ەتنوسارالىق قاتىناستار سالاسىنداعى مەملەكەتتىك ساياساتتى ىسكە اسىرۋ اياسىندا جىل باسىنان بەرى رەسپۋبليكا وڭىرلەرىندە اقپاراتتىق-ءتۇسىندىرۋ توپتارى بەلسەندى جۇمىس ىستەۋدە. ولاردىڭ قاتىسۋىمەن ازاماتتاردىڭ قۇقىقتىق جانە ەتنوساياسي ساۋاتتىلىعىن ارتتىرۋعا باعىتتالعان 2000-نان استام وقىتۋ جانە الدىن الۋ ءىس-شاراسى وتكىزىلدى.
ەتنومەدياتسيا ينستيتۋتىن دامىتۋعا ەرەكشە كوڭىل بولىنۋدە. ەلىمىزدە كاسىبي مەدياتورلار، زاڭگەرلەر، پەداگوگتار، پسيحولوگتار، ءدىنتانۋشىلار، جۋرناليستەر مەن قوعام بەلسەندىلەرى كىرەتىن 20-دان استام ورتالىقتار مەن كەڭەستەر جۇمىس ىستەيدى. 2025 جىلدىڭ العاشقى جارتىسىندا ولار 500-گە جۋىق ءىس-شارا وتكىزىپ، وعان 22 مىڭنان استام ادام قاتىسقان.
بيىلدان باستاپ ەلدەگى 14 جوعارى وقۋ ورنىندا جۋرناليستيكا ماماندىعى بويىنشا وقيتىن ستۋدەنتتەرگە ارنالعان «ەتنوساياسي ساۋاتتىلىق» اتتى جاڭا ءپان ەنگىزىلدى. بۇل جۋرناليستەردىڭ مەديا كەڭىستىكتە ەتنوستىق تاقىرىپتارعا جاۋاپكەرشىلىكپەن قاراۋعا، تۇراقتى مادەنيەتتى قالىپتاستىرۋعا سەپ ىقپال ەتەدى.
ەتنوسارالىق قاقتىعىستاردىڭ الدىن الۋ بويىنشا قازاقستان حالقى اسسامبلەياسى جانىنداعى انالار كەڭەسى بەلسەندى ءرول اتقارۋدا. بۇگىندە 1700-دەن استام وسىنداي ۇيىم جۇمىس ىستەيدى. ولار ادامگەرشىلىك قۇندىلىقتاردى ناسيحاتتاۋعا جانە وتباسىلىق تاربيەنى نىعايتۋعا باعىتتالعان جوبالاردى جۇزەگە اسىرۋدا. سونىمەن قاتار، جارتى جىل ىشىندە 300-دەن استام ماسەلەنى قاراستىرىپ، 200-دەن استام ۇسىنىس جاساعان اقساقالدار كەڭەسى دە ءتيىمدى جۇمىس جاساۋدا.
«جومارت جان» ورتالىقتارىندا 340-تان استام مەتسەنات، ۆولونتەر مەن قوعام قايراتكەرى بىرىگىپ، قايىرىمدىلىق باعىت بويىنشا جۇمىس جاساپ كەلەدى. ولار جىل باسىنان بەرى 500-دەن استام ءىس-شارا ۇيىمداستىرىپ، جالپى سوماسى 304 ميلليون تەڭگەدەن استام كومەك كورسەتكەن.
ازاماتتىق جاۋاپكەرشىلىك مادەنيەتىن قالىپتاستىرۋعا ەكولوگيالىق اكتسيالارعا قاتىسۋشىلار دا ايتارلىقتاي ۇلەس قوسىپ كەلەدى. «تازا قازاقستان» جالپىۇلتتىق باستاماسى اياسىندا 300 مىڭنان استام ەتنومادەني بىرلەستىك وكىلدەرى، جاستار مەن ۆولونتەرلەر قاتىسقان ءتۇرلى ءىس-شارالار ۇيىمداستىرىلدى.
