29 شىلدە كۇنى كەشكى ساعات 21:30 شاماسىندا جامبىل وبلىسى، مويىنقۇم اۋىلىندا قارۋلى قاقتىعىس بولىپ، ءتورت ادام جاراقات الدى، دەپ حابارلايدى "ادىرنا" ۇلتتىق پورتالى.
بۇل تۋرالى وڭىرلىك پوليتسيا دەپارتامەنتىنىڭ ءباسپاسوز قىزمەتى مالىمدەدى.
الدىن الا مالىمەت بويىنشا، جابىرلەنۋشىلەر تراۆماتيكالىق قارۋدان جاراقات العان. وقيعا ورنىنا جەدەل تەرگەۋ توبى جىبەرىلىپ، قىلمىستىڭ ءمان-جايى انىقتالا باستادى.
اتالعان فاكت بويىنشا قر قىلمىستىق كودەكسىنىڭ 24-بابى 3-بولىگى جانە 99-بابى 2-بولىگى “ادام ولتىرۋگە وقتالۋ، ەكى نەمەسە ودان دا كوپ ادامعا قارسى، توپتاسىپ، الدىن الا ءسوز بايلاسۋ ارقىلى، بۇزاقىلىق نيەتپەن جاسالعان” بويىنشا قىلمىستىق ءىس قوزعالدى.
پوليتسيا مالىمەتىنشە، كۇدىكتىلەردى انىقتاۋ جانە ۇستاۋ ماقساتىندا جەدەل-ىزدەستىرۋ شارالارى جۇرگىزىلۋدە. وقيعاعا قاتىستى باسقا اقپاراتتار تەرگەۋ مۇددەسىنە بايلانىستى جاريالانباي وتىر.
“قازىر بارلىق ءمان-جاي انىقتالىپ جاتىر. قىلمىستىق-پروتسەستىك كودەكستىڭ 201-بابىنا سايكەس، تەرگەۋگە كەدەرگى كەلتىرمەۋ ماقساتىندا وزگە مالىمەتتەر جاريالاۋعا جاتپايدى”، – دەپ مالىمدەدى دەپارتامەنتتىڭ ءباسپاسوز قىزمەتى.
