ۇلتتىق قورعانىس ۋنيۆەرسيتەتىندە بولاشاق قولباسشىلار مەن اسكەري باسقارۋ جۇيەسىنىڭ جەتەكشىلەرى بولىپ سانالاتىن ماگيسترانتتاردىڭ سالتاناتتى ءبىتىرۋ ءراسىمى ءوتتى. بيىل ماگيستراتۋرا باعدارلاماسىن 66 اسكەري قىزمەتشى ءساتتى اياقتادى. ولاردىڭ قاتارىندا قورعانىس مينيسترلىگى، ۇقك، ءىىم، ۇلتتىق ۇلان جانە باسقا دا كۇشتىك قۇرىلىمداردىڭ وفيتسەرلەرى مەن گەنەرالدارى بار، دەپ حابارلايدى «ادىرنا» ءتىلشىسى.
قورعانىس ءمينيسترىنىڭ ورىنباسارى گەنەرال-لەيتەنانت قانىش ابۋباكىروۆ تۇلەكتەردى قۇتتىقتاپ، ساتتىلىك تىلەدى.
«بۇگىن سىزدەر كاسىبي ءارى اكادەميالىق دامۋدىڭ ماڭىزدى كەزەڭىن اياقتاپ وتىرسىزدار. ۋنيۆەرسيتەت قابىرعاسىندا العان ءبىلىم، داعدى مەن وفيتسەرگە ءتان قاسيەتتەر — وتان الدىنداعى قىزمەتتىڭ بەرىك ىرگەتاسى بولماق. باسشىلىقتىڭ اتىنان بارشاڭىزدى وقۋ ورنىن ءساتتى اياقتاۋمەن قۇتتىقتايمىن. ارقايسىڭىزبەن ماقتانامىن!»—دەدى ول.
بۇدان بولەك، اۋباكىروۆ اسكەري ءبىلىم بەرۋ جۇيەسىن دامىتۋعا قوسقان ۇلەستەرى ءۇشىن پروفەسسورلىق-وقىتۋشىلىق قۇرام مەن عىلىمي قىزمەتكەرلەرگە دە العىس ءبىلدىردى.
ۇزدىك تۇلەكتەر قاتارىندا — گەنەرال-مايور داۋلەت وسپانوۆ، ادىلەت پودپولكوۆنيگى نۇرجان جاپاروۆ جانە مەديتسينا قىزمەتىنىڭ مايورى تالعات سليامباەۆ بار. ۋنيۆەرسيتەت تاريحىندا العاش رەت مەديتسينا قىزمەتىنىڭ وفيتسەرلەرى ماگيستر دارەجەسىن يەلەنگەنىن ايتا كەتۋ كەرەك.
جوعارى دايىندىق دەڭگەيىن كورسەتكەن ۇزدىك ماگيسترانتتارعا توسبەلگىلەر تابىستالىپ، ەسىمدەرى ۋنيۆەرسيتەتتىڭ قۇرمەت تاقتاسىنا ەنگىزىلدى.
ايتا كەتەيىك، ۇلتتىق قورعانىس ۋنيۆەرسيتەتى — ورتا ازياداعى جەدەل-تاكتيكالىق، جەدەل-ستراتەگيالىق جانە ستراتەگيالىق دەڭگەيدەگى وفيتسەرلەردى دايىندايتىن جالعىز جوعارى وقۋ ورنى. مۇندا تەك قازاقستان قارۋلى كۇشتەرىنىڭ عانا ەمەس، ۇقشۇ مۇشە ەلدەر مەن الىس شەت ەلدەرىنىڭ وكىلدەرى دە ءبىلىم الادى. بۇل ءوز كەزەگىندە ءبىلىم ورداسىن حالىقارالىق اسكەري ارىپتەستىكتىڭ ماڭىزدى الاڭىنا اينالدىرادى.
