Ūlttyq qorǧanys universitetınde bolaşaq qolbasşylar men äskeri basqaru jüiesınıŋ jetekşılerı bolyp sanalatyn magistranttardyŋ saltanatty bıtıru räsımı öttı. Biyl magistratura baǧdarlamasyn 66 äskeri qyzmetşı sättı aiaqtady. Olardyŋ qatarynda Qorǧanys ministrlıgı, ŪQK, IIM, Ūlttyq ūlan jäne basqa da küştık qūrylymdardyŋ ofiserlerı men generaldary bar, dep habarlaidy «Adyrna» tılşısı.
Qorǧanys ministrınıŋ orynbasary general-leitenant Qanyş Äbubäkırov tülekterdı qūttyqtap, sättılık tıledı.
«Bügın sızder käsıbi ärı akademiialyq damudyŋ maŋyzdy kezeŋın aiaqtap otyrsyzdar. Universitet qabyrǧasynda alǧan bılım, daǧdy men ofiserge tän qasietter — Otan aldyndaǧy qyzmettıŋ berık ırgetasy bolmaq. Basşylyqtyŋ atynan barşaŋyzdy oqu ornyn sättı aiaqtaumen qūttyqtaimyn. Ärqaisyŋyzben maqtanamyn!»—dedı ol.
Būdan bölek, Äubäkırov äskeri bılım beru jüiesın damytuǧa qosqan ülesterı üşın professorlyq-oqytuşylyq qūram men ǧylymi qyzmetkerlerge de alǧys bıldırdı.
Üzdık tülekter qatarynda — general-maior Däulet Ospanov, ädılet podpolkovnigı Nūrjan Japarov jäne medisina qyzmetınıŋ maiory Talǧat Sliambaev bar. Universitet tarihynda alǧaş ret medisina qyzmetınıŋ ofiserlerı magistr därejesın ielengenın aita ketu kerek.
Joǧary daiyndyq deŋgeiın körsetken üzdık magistranttarǧa tösbelgıler tabystalyp, esımderı universitettıŋ Qūrmet taqtasyna engızıldı.
Aita keteiık, Ūlttyq qorǧanys universitetı — Orta Aziiadaǧy jedel-taktikalyq, jedel-strategiialyq jäne strategiialyq deŋgeidegı ofiserlerdı daiyndaityn jalǧyz joǧary oqu orny. Mūnda tek Qazaqstan Qaruly Küşterınıŋ ǧana emes, ŪQŞŪ müşe elder men alys şet elderınıŋ ökılderı de bılım alady. Būl öz kezegınde bılım ordasyn halyqaralyq äskeri ärıptestıktıŋ maŋyzdy alaŋyna ainaldyrady.
