ءيزرايلدىڭ قاتاڭ قورشاۋىنداعى گازا سەكتورىندا سوڭعى ءبىر تاۋلىكتە اشتىقتان بەس پالەستينالىق كوز جۇمدى، ولاردىڭ ەكەۋى – بالالار. بۇل تۋرالى پالەستينا دەنساۋلىق ساقتاۋ مينيسترلىگىنىڭ باس ديرەكتورى مۋنير ءال-بەرش ايتتى، دەپ حابارلايدى «ادىرنا» ءتىلشىسى.
«گازاداعى بالالار اشتىقتان ءولىپ جاتىر. قۇربانداردىڭ جالپى سانى 127 ادامعا جەتتى، ولاردىڭ اراسىندا 85 بالا بار»،— دەپ جازدى ءال-بەرش X جەلىسىندەگى پاراقشاسىندا.
ۆەدومستۆو وكىلى ءيزرايلدى گۋمانيتارلىق كومەكتىڭ جەتكىزىلۋىنە توسقاۋىل قويىپ وتىر دەپ ايىپتادى. ايتۋىنشا، ازىق-تۇلىك جۇكتەرى شەكارالىق باقىلاۋ-وتكىزۋ بەكەتتەرىندە كىدىرىپ قالۋدا، ال حالىقارالىق قاۋىمداستىق بۇل جاعدايعا بەي-جاي قاراپ وتىر.
ءال-بەرش «باياۋ ولىمگە» جول بەرمەۋگە شاقىرىپ، گازاداعى ادامداردىڭ ءومىرىن ساقتاۋ ءۇشىن شەكارا وتكەلدەرىن اشۋدى تالاپ ەتتى.
ايتا كەتەيىك، 2023 جىلعى 7 قازاننان بەرى يزرايل اسكەرىنىڭ شابۋىلدارى ناتيجەسىندە كەمىندە 59 676 پالەستينالىق قازا تاۋىپ, 143 965 ادام جاراقات العان.
