پرەزيدەنت قاسىم-جومارت توقاەۆتىڭ تاپسىرماسىنا سايكەس سىرتقى ىستەر مينيسترلىگى گازا سەكتورىنداعى قازاقستاندىقتاردى ەۆاكۋاتسيالاۋدى جۇزەگە اسىردى، دەپ حابارلايدى «ادىرنا» ءتىلشىسى.
«بۇگىن ارنايى ەۆاكۋاتسيالىق بورتپەن 99 جولاۋشى – قازاقستان ازاماتتارى مەن ولاردىڭ وتباسى مۇشەلەرى الماتى قالاسىنا امان-ەسەن ۇشىپ كەلدى.
اۋەجايداعى بارلىق مىندەتتى راسىمدەردەن وتكەننەن كەيىن ەۆاكۋاتسيالانعان ازاماتتارعا ۋاقىتشا باسپانا بەرىلىپ، ولارعا قاجەتتى قۇقىقتىق، مەديتسينالىق جانە وزگە دە كومەك كورسەتىلۋدە.
ءساتتى ىسكە اسىرىلعان ەۆاكۋاتسيالاۋ قازاقستاننىڭ يزرايلدەگى، يوردانياداعى جانە مىسىرداعى ەلشىلىكتەرىنىڭ وسى ەلدەردىڭ ۋاكىلەتتى ورگاندارىمەن جانە حالىقارالىق ۇيىمدارمەن بىرلەسكەن ۇيلەسىمدى جۇمىسىنىڭ ناتيجەسى»،—دەپ ءتۇسىندىردى سىرتى ىستەر مينيسترلىگى.
قازاقستاندىق ديپلوماتتار قاقتىعىس ايماعىندا قالىپ قويعان قازاقستان ازاماتتارىنا كومەك كورسەتۋ جانە ەۆاكۋاتسيالىق ءىس-شارالاردى ۇيىمداستىرۋ جونىندەگى جۇمىستى جالعاستىرادى.
