يزرايل پرەمەر-ءمينيسترى بينيامين نەتانياحۋ اقش-تىڭ يرانعا جاساعان سوققىلارىنا بايلانىستى مالىمدەمە جاساپ، بۇل شابۋىلداردى «تاريحتى وزگەرتەتىن باتىل شەشىم» دەپ اتادى، دەپ حابارلايدى “ادىرنا” ۇلتتىق پورتالى.
ول اقش پرەزيدەنتى دونالد ترامپقا العىسىن ءبىلدىردى.
يزرايل پرەمەرىنىڭ بۇل ۇندەۋى اقش-تىڭ يادرولىق نىساندارعا جاساعان شابۋىلىنان كەيىن بىردەن جاريالاندى.
«پرەزيدەنت ترامپ ەكەۋىمىز ءجيى ايتامىز: “كۇش ارقىلى بەيبىتشىلىككە قول جەتكىزۋگە بولادى”. الدىمەن — كۇش، سودان كەيىن — بەيبىتشىلىك. بۇگىن كەشكە دونالد ترامپ پەن امەريكا قۇراما شتاتتارى وتە باتىل ارەكەت ەتتى»، - دەدى نەتانياحۋ ءوز مالىمدەمەسىندە.
شابۋىلدان كەيىن يراننىڭ يادرولىق قاۋىپسىزدىك ورتالىعى قانداي دا ءبىر رادياتسيالىق لاستانۋ انىقتالماعانىن حابارلادى. سونىمەن قاتار، يراننىڭ مەملەكەتتىك راديو مەن تەلەديدارى باس ديرەكتورىنىڭ ورىنباسارى حاسان ابەديني ءۇش يادرولىق نىساننان (فوردو، ناتانز جانە يسفاحان) ەۆاكۋاتسيا شابۋىلعا دەيىن ءبىراز ۋاقىت بۇرىن اياقتالعانىن ايتتى. ونىڭ ايتۋىنشا، بايىتىلعان ۋران قورلارى الدىن الا قاۋىپسىز جەرگە كوشىرىلگەن، سوندىقتان رادياتسيالىق قاۋىپ جوق.
