موڭعوليا پرەزيدەنتى ۋحنااگين حۋرەلسۋحتىڭ تاجىكستان رەسپۋبليكاسىنا جاساعان مەملەكەتتىك ساپارى اياقتالدى، دەپ حابارلايدى «ادىرنا» ءتىلشىسى «مونتسامە» اگەنتتىگىنە سىلتەمە جاساپ.
ساپار اياسىندا ەكى ەل پرەزيدەنتى جەكە كەزدەسىپ، رەسمي كەلىسسوزدەر جۇرگىزدى. سونداي-اق ەكىجاقتى قاتىناستار مەن وڭىرلىك جانە حالىقارالىق دەڭگەيدەگى ىنتىماقتاستىققا قاتىستى كەڭ اۋقىمدى ماسەلەلەر بويىنشا پىكىر الماستى.
«مەملەكەت باسشىلارى موڭعوليا مەن تاجىكستان رەسپۋبليكاسىنىڭ دوستىق قاتىناستارىن جانە كوپجاقتى ىنتىماقتاستىقتى دامىتۋ تۋرالى بىرلەسكەن مالىمدەمە جاسادى»، - دەلىنگەن حابارلامادا.
ساپار اياسىندا اۋىل شارۋاشىلىعى، اۆتوموبيل كولىگى، ەنەرگەتيكا جانە تۋريزم سالالارىندا ءوزارا قاتىناستار مەن ىنتىماقتاستىقتى كەڭەيتۋ جانە دامىتۋعا قاتىستى 11 قۇجاتقا قول قويىلدى.
ايتا كەتەيىك، بۇل موڭعوليا پرەزيدەنتىنىڭ تاجىكستانعا جاساعان العاشقى مەملەكەتتىك ساپارى بولدى. ول بۇدان الدىن قىرعىزستانعا مەملەكەتتىك ساپارمەن بارىپ، سوڭىنان ساپارىن تاجىكستاندا جالعاستىرعان بولاتىن.
